ކޮރަޕްޝަނާއި ދެކޮޅަށް މަސައްކަތްކުރާނެ މީހުން ބިނާކުރުމަށްޓަކައި އެކަޑަމީއެއް އުފެއްދަން ތައްޔާރުވެފައިވާ ކަމަށް އެންޓި-ކޮރަޕްޝަން ކޮމިޝަން (އޭސީސީ) އިން ބުނެފި އެވެ.
އެތަނުން ބުނީ އެ އެކަޑެމީ އުފެއްދުމަށްޓަކައި މިހާރު ކޯސްތައް ފަރުމާކުރުމާއި، އެކްރެޑިޓޭޝަނަށް ފޮނުވުމުގެ މަސައްކަތް ކުރަމުން އަންނަ ކަމަށެވެ. އަދި އެ އެކަޑެމީގެ މަސައްކަތްތައް ފަށާ އިރު، ކިޔަވައި ދޭން ހަމަޖެހިފައި ވަނީ ސެޓްފިކެޓް ލެވެލް 4 ގެ ކޯސްތަކާއި ޑިޕްލޮމާ ލެވެލްގެ ކޯސްތައް ކަމަށް ވެސް ބުންޏެވެ.
އޭސީސީން ބުނީ އެތަނުން އުފައްދާ އެކަޑެމީ މާދަމާ ފާހަގަކުރާ ބައިނަލްއަގުވާމީ އެންޓި-ކޮރަޕްޝަން ދުވަހާ ގުޅުވައިގެން ބާއްވާ ޖަލްސާގައި ލޯންޗްކުރާނެ ކަމަށެވެ.
މި ތަނުގެ މައިގަނޑު މަގުސަދަކީ ކޮރަޕްޝަނާއި ދެކޮޅަށް ކުރެވޭ މަސައްކަތުގައި ގުޅިލާމެހޭނެހެން ތަޢުލީމާއި ތަމްރީނު ދިނުމާއި، އެ ދާއިރާއާއި ގުޅޭ ދިރާސާތައް އެކުލަވާލުމާއި، މުޖުތަމަޢުގެ ތެރޭގައި ހޭލުންތެރިކަން އިތުރުކުރުމެވެ.