ކައުންސިލްތަކަށް އާމްދަނީ ހޯދޭނެ ގޮތްތައް ފަހިކޮށް ދިނުމުގެ ގޮތުން އެ ކައުންސިލެއްގެ ނިސްބަތްވާ އަތޮޅަކުން ރަށާއި ފަޅު ވަކި އުސޫލުތަކެއްގެ ތެރެއިން ދޭ ގޮތަށް ރައީސް ޑރ. މުހައްމަދު މުއިއްޒު ނިންމަވައިފި އެވެ.
އެ ގޮތަށް ނިންމެވިކަން އިއުލާންކުރެއްވީ އިއްޔެ ރައީސް ބޭއްވެވި ނޫސް ކޮންފަރެންސްގަ އެވެ.
ރައީސް ވިދާޅުވީ ކައުންސިލްތަކުގެ އިހުތިސާސްތަކުގެ ދަށުގައި، މިހާރު އެ ރަށަކުން ފެށިގެން 700 މީޓަރާ ދެމެދުގައި ހިމެނޭ ފަޅުތަކާއި ރަށްތައް ހިމެނޭ ގޮތަށް އޮތްނަމަވެސް ބައެއް ރަށްރަށުގެ އިހުތިސާސް ހިނގާ ސަހަރައްދުގައި ރަށެއް ނެތުން ނުވަތަ ރަށެއް އޮތް ނަމަވެސް އެހެން ކަމަކަށް އެ ރަށެއް ދޫކޮށްފައި އޮތުން ފަދަ ދަތިތައް ހުރި ކަމަށެވެ.
އެހެންވެ އެ ދަތިކަން ނައްތައިލަން ނިންމެވީ މައިގަނޑު ދެ ހަމައެއްގެ މަތިން ކަމަށް ރައީސް މުއިއްޒު ވިދާޅުވިއެވެ. އެ ދެ ހަމައަކީ ސަރުކާރުގެ ޤައުމީ ތަރައްގީގެ ޕްލޭންއާ ދިމާވާ ނިންމުމަކަށްވުމާ އެކު އެ ފަޅެއް ނުވަތަ އެރަށެއް ނިސްބަތްވާ އަތޮޅުގައި ހިމެނޭ މީހުން ދިރިއުޅޭ އެހެން ހުރިހާ ރަށެއްގެ ރައްޔިތުންގެ ރުހުން އެކަމަށް އޮތުން ކަމަށް ވިދާޅުވި އެވެ.
ރައީސް މުއިއްޒު ވިދާޅުވީ ރާއްޖޭގެ ޤައުމީ ތަރައްގީ އަށް ބޭނުންހި ފޭގޮތަށް، އަދި ރާއްޖޭގައި ހިނގާ މައިގަނޑު ސިނާއަތްތަކަށް ގެއްލުން ނުވާ ގޮތަށް އެފަދަ ފަޅެއް ނުވަތަ ރަށެއް ލިބުމުގެ ފުރުޞަތު ކައުންސިލްތަކަށް ދިނުމަކީ އޭގެ ސަބަބުން ރައްޔިތުން ބާރުވެރިކުރެވި ކައުންސިލްތައް އިތުރަށް ކުރިއަރައިގެން ދާނެ ކަމެއް ކަމަށެވެ.
ރަށްރަށުގެ ރައްޔިތުންގެ މަންފާ އަށް އެ ރަށްރަށުގެ އިހުތިސާސް ތެރޭގައި ހިމެނޭ ރަށްރަށް ނުވަތަ ސަރަހައްދުތައް އެ ރަށެއްގެ އިހުތިސާސްގެ ތެރޭގައި ހިމެނުމަކީ ސަރުކާރުގެ "ހަފުތާ 14" މަގުޗާޓުގައި ވެސް ހިމެނޭ ކަމެކެވެ.