ރީޖަނަލް އެއާޕޯޓްތަކުގެ ހާލަތު ވަޒަންކުރުމުގެ މަސައްކަތް މިހާރު ކުރިއަށްދާ ކަމަށް ރީޖަނަލް އެއާޕޯޓް ކުންފުނިން ބުނެފި އެވެ.
އެ ކުންފުނީގެ އާ މެނޭޖިން ޑިރެކްޓަރު އަހުމަދު މުބީން ވިދާޅުވީ އެއާޕޯޓްތައް އެސެސްކުރުމުގެ މަސައްކަތް ކުރަމުން އަންނަ އިރު، ކުރިއަށް އޮތް މަސް ދުވަހުގެ ތެރޭގައި އެކަން ނިންމައިލެވޭނެ ކަމަށެވެ. އަދި މިހާރުން މިހާރަށް ވެސް ބައެއް އެއާޕޯޓްތަކުގެ ކަންކަން ރަނގަޅު ކުރުމަށް ކުރަން ޖެހޭ ކަންކަން ކުރިއަށްދާ ކަމަށް ވިދާޅުވި އެވެ.
މުބީން ވިދާޅުވީ ބައެއް ރީޖަނަލް އެއާޕޯޓްތަކެއް މިހާރު އޮތީ މަރާމާތުތަކެއް ވެސް ކުރަން ޖެހިފައި ކަމަށެވެ. އެގޮތުން ގިނަ އެއާޕޯޓްތަކެއްގެ އިމާރާތްތަކުން ފެން ލީކުވުން ފަދަ މައްސަލަތައް ހުރި ކަމަށް ވިދާޅުވި އެވެ. އެހެންވެ މިހާރު އެންމެ ބޮޑު އިސްކަމެއް ދީގެން ކުރިއަށް ދަނީ ރީޖަނަލް ހުރިހާ އެއާޕޯޓެއްގެ ހާލަތު ވަކިވަކިން ބެލުން ކަމަށް ވިދާޅުވި އެވެ.
މުބީން ވިދާޅުވީ ކުރިއަށް އޮތް ތަނުގައި އެއާޕޯޓްތައް ޑިޒައިންކުރާ ހިސާބުން ފެށިގެން ރީޖަނަލް އެއާޕޯޓްގެ ބައިވެރިވުން އޮންނާނެ ގޮތަށް ކަންކަން ބައްޓަން ކުރައްވާނެ ކަމަށެވެ. އަދި އެއާޕޯޓްތައް ހަދާނީ 50 އަހަރު ދުވަހުގެ މުއްދަތަށް މަރާމާތެއް ކުރަން ނުޖެހޭ ފެންވަރަށް ކަމަށް ވިދާޅުވި އެވެ.
ރީޖަނަލް އެއާޕޯޓްގެ ދަށުގައި ހުރި އެއަޕޯޓްތަކަކީ ހަނިމާދޫ އިންޓަނޭޝަނަލް އެއާޕޯޓް، ކުޅުދުއްފުށި އެއާޕޯޓް، ހޯރަފުށި އެއާޕޯޓް، ފުނަދޫ އެއާޕޯޓް، މާވަރުލު އެއާޕޯޓް، ފަރެސްމާތޮޑާ އެއާޕޯޓްގެ އިތުރުން ފުވައްމުލަކު އެއާޕޯޓެވެ.
މިހާރު ހަދަމުން އަންނަ މަގޫދޫ އެއާޕޯޓަކީ ވެސް ރީޖަނަލް އެއާޕޯޓްސްގެ ދަށުން ހިންގާނެ އެއާޕޯޓެކެވެ.