ޓީވީ ސިލްސިލާތައް އުފެއްދުމުގެ އިތުރުން ކާމިޔާބު ފިލްމްތަކެއް ވެސް ބެލުންތެރިންނާ ހަމައަށް ގެނެސް ދީފައިވާ ޕްރޮޑިއުސަރު އެކްތާ ކަޕޫރު "އީކޭ" ގެ ނަމުގައި އަމިއްލަ ފެޝަން ލޭބަލެއް މިއަދު ލޯންޗްކޮށްފި އެވެ.
"އީކޭ" އަކީ އެކްތާގެ ދެ ނަމުގެ ފެށޭ ދެ އަކްރެވެ.
"ކަސޯޓީ" އާއި "ކުސުމް"، "ކިއު ކީ ސާސް ބީ ކަބީ ބަހޫތީ" އަދި "ކަހީތޯ ހޯގާ" ފަދަ މަޝްހޫރު އެތަކެއް ސިލްސިލާތަކެއް އުފައްދާފައިވާ އެކްތާގެ ފެޝަން ލޭބަލް ލޯންޗް ކުރަން ބޭއްވި ހަފުލާގައި ގިނައިން ބައިވެރިވީ ވެސް ޓީވީ ތަރިންނެވެ.
އޭގެ ތެރޭގައި އަނީތާ ހަސަންދާނީ، ސާކްޝީ ތަންވަރު،ދިވްޔަންކާ ތްރިޕަތި އަދި ކަރަން ޕަޓޭލް ހިމެނެ އެވެ.
"އީކޭ" ނުވަަތަ "އޭކް" ލޯންޗް ކުރަން ބޭއްވި ހަފުލާގައި ނޫސްވެރިންނާ ވާހަކަ ދައްކަމުން "ދަ ޑާޓީ ޕިކްޗަ" އާއި "ވަންސް އަޕޮން އަ ޓައިމް އިން މުމްބާއީ" ފަދަ ފިލްމްތައް ވެސް ބެލުންތެރިންނާ ހަމައަށް ގެނެސް ދީފައިވާ އެކްތާ ބުނީ އޭނާގެ ފެޝަން ލޭބަލާ އެކު ބާޒާރަށް ނިކުންނަ ހެދުންތައް މި މަހުގެ 18 ވަނަ ދުވަހުން ފެށިގެން، ދާދި ފަހުން ލޯންޗް ކުރި ސެލެބްރިޓީ ފެޝަން ޗެނަލް "ބެސްޓްޑީލް ޓީވީ" މެދުވެރިކޮށް ގަންނަން ލިބޭނެ ކަމަށެވެ.
ބެސްޓްޑީލް ޓީވީއަކީ ބަތަލާ ޝިލްޕާ ޝެޓީ އާއި އޭނާގެ ފިރިމީހާ ރާޖް ކުންދްރާގެ އިތުރުން ޝިލްޕާގެ ކުރީގެ ލޯބިވެރިޔާ އަދި އެކްޓަރު އަކްޝޭ ކުމާރު ގުޅިގެން ހިންގާ ޓީވީ ޗެނަލެކެވެ.
އެކްތާގެ ލޭބަލާ ބެހޭ ގޮތުން ބެސްޓްޑީލްގެ ސީއީއޯ ރާޖް ކުންދުރާ ބުނީ އެކްތާއަކީ ހަމައެކަނި ޓީވީ ސިލްސިލާތަކާއި ކާމިޔާބު ފިލްމްތަކެއް ގެނެސްދޭ ފަންނާނެއް ނޫން ކަމަށެވެ.
އޭގެ އިތުރަށް އޭނާއަކީ މިހާރު ފެޝަންގެ ދުނިޔެ އަށް ވެސް ނިކުމެފައިވާ ކާމިޔާބު އަންހެނެއް ކަމަށް ކުންދްރާ ބުންޏެވެ.
އާއިލީ ފިލްމް ކުންފުނި "ބަލާޖީ" ހިންގުމުގައި އެންމެ އިސް ރޯލެއް އަދާ ކުރާ އެކްތާ ބުނީ އޭނާއަކީ އަބަދުވެސް އާ ކަންތައްތަކެއް ތެރެއަށް ވަދެ ތަޖުރިބާކޮށްލަން ބޭނުންވާ މީހެއް ކަމަށެވެ.
އެހެންވެ އާ ވިޔަފާރީއެއްގެ ތެރެއަަށް ވަދެވުމަކީ އަނެއްކާ ވެސް އުންމީދެއް ހާސިލް ކުރެވުން ކަމަށް އެކްތާ ބުންޏެވެ. އޭނާ ބުނީ "އީކޭ" ގެ ލޭބަލް ޖެހިގެން ނިކުންނަ އުފެއްދުންތަކަކީ އާންމުން އަތްފޯރާ އަގުގައި ލިބޭނެ އުފެއްދުންތަކެއް ކަމަށެވެ.
އެކްތާއަކީ ކުރީގެ މަޝްހޫރު ތަރި ޖީތެންދުރާގެ ދަރިއެކެވެ. ތުޝާރު ކަޕޫރަކީ އެކްތާގެ ހަމައެކަނި ކޮއްކޮ އެވެ.