މާރާމާރީތަކާއި ގުޅިގެން އައްޑޫއިން މިހާތަނަށް ހައްޔަރު ކުރި 11 މީހުންގެ ތެރެއިން އެކަކު ދޫކޮއްލާފައިވާ ކަމަށް ފުލުހުން ބުނެފިއެވެ.
އައްޑޫގައި މާރާމާރީ އިތުރުވެފައިވާ މި ދަނޑިވަޅުގައި ފުލުހުން ހިނގަމުންދާ ހާއްސަ އޮޕަރޭޝަނުގެ ދަށުން 11 މީހަކު މިހާތަނަށް ހައްޔަރުކުރިއެވެ. އޭގެ ތެރެއިން 1 ބަނދުގައި ބަހައްޓަން ޖެހޭ އިތުރު ސަބަބެއް ނެތުމުގެ މިހާރު ދޫކޮށްލާފައިވާއިރު، ބާކީ ތިބި 10 މީހުންނަށް ކޯޓުން ވަނީ މުއްދަތު ޖަހާފައެވެ.
އައްޑޫގައި މާރާމާރީތައް ފެށުނީ ފާރެއްގައި ކުރަހާފައި ހުރި ގްރެފިޓީތަކެއްގެ މައްޗަށް އެހެން ގޭންގެއްގެ ބަޔަކު ގްރެފިޓީތަކެއް ޖެހުމުން ކަމަށް ފުލުހުން ބުނެއެވެ. އެކަމާ ގުޅިގެން ހިތްހަމަނުޖެހުންތައް ބޮޑުވެ، އެންމެ ފަހުން ގޭންގު ދެމެދު މައްސަލަ ޖެހި މާރާމާރީއާއި ހިސާބައް ދިޔައީ ކަމަށް ފުލުހުން ބުނެއެވެ.
މިމައްސަލާގައި ބަޔަކު ހައްޔަރު ކޮށްފައިވާއިރު، ފުލުހުން ވަނީ މާރާމާރީ ހިންގުމަށް ބޭނުން ކުރާ ހަތިޔާރުވެސް ހޯދާފައެވެ. އަދި އެކި ތަންތަން ބަލާ ފާސް ކުރުމާއި މީހުންނާއި ސުވާލު ކުރަމުން ފުލުހުންގެ އޮޕަރޭޝަން ކުރިއަށް ދެއެވެ.
މި މާރާމާރީތަކުގައި އަނިޔާވި އެކަކު ހާލު ސީރިއަސްވެ އޭނާ ވަނީ މާލެ އިތުރު ފަރުވާއަށް ފޮނުވާލާފައެވެ. އަދި ބަދަލު ހިފުމުގެ ގޮތުން ހިންގި އެހެން މާރާމާރީއެއްގައި އަނިޔާވި ޒުވާނާ އަށް އޭއީއެޗްގައި ދަނީ ފަރުވާ ދެމުންނެވެ. އޭނާއަށް ހާލު ރަނގަޅު ނަަމަވެސް އޭނާއަށްވެސް ސީރިއަސް އަނިޔާތަކެއް ވަނީ ވެފައެވެ.
އައްޑޫގައި މާރާމާރިތައް އިތުރުވެފައިވާއިރު، ވައްކަމާއި ފޭރުމުގެ މައްސަތައްވެސް މިފަހަކަށް އައިސް ވަނީ އިތުރުވެފައެވެ.