އައްޑޫގެ ގުޅިފައިވާ ރައްތަކަށް ފެނުގެ ޚިދުމަތް ފޯރުކޮށްދޭ ސެންޓްރަލް ޑީސެލިނޭޝަން ޕްލާންޓަށް މައްސަލައެއް ދިމާވެގެން މިއަދު ހެނދުނުން ފެށިގެން ގުޅިފައިވާ ރައްތަކުން ފެނުގެ ޚިދުމަތް ކެނޑިއްޖެއެވެ.
އައްޑޫގެ ގުޅިފައިވާ ރައްތަކަށް ފެނުގެ ޚިދުމަތް ފޯރުކޮށްދެނީ ހިތަދޫގައި ހުންނަ ސެންޓްރަލް ޑީސެލިނޭޝަން ޕްލާންޓުންނެވެ. މި ޕްލާންޓަށް ދިމާވި މައްސަލައެއް ސީދާ ފެނަކައިން ސާފުކޮށް ނުދިން ނަމަވެސް މިހާރު ޕްލާންޓު މަރާމާތު ކުރުމުގެ މަސައްކަތް ކުރަމުންދާ ކަމަށް ފެނަކަ އައްޑޫ ބްރާންޗުން ބުނެއެވެ. ނަމަވެސް އަދި ޚިދުމަތް ދޭން ފެށޭނެ ގަޑިއެއް ނޭނގޭ ކަމަށް އެ ފާރާތުން ބުނެއެވެ.
އައްޑޫގެ ގުޅިފައިވާ ރައްތަކަށް ފެނުގެ ޚިދުމަތް ކެނޑިފައިވާއިރު، ޕްލާންޓުން ފުރަތަމަ ފެން ފޮނުވަނީ ޓޭންކުތަކަށެވެ. ފެނަކައިން ބުނީ ފެނުގެ ޚިދުމަތް ކެނޑެމުންދާނީ ފެން ޓޭންކުތައް ހުސްވާ ސަރަހައްދުތަކުން ކަމަށެވެ. މައުލޫމާތު ލިބިފައިވާ ގޮތުގައި މިގަޑިއާއި ހިސާބައް އައިއިރު ގިނަ ސަރަހައްދު ތަކުން އެއްކޮށްހެން ފެން ވަނީ ކެނޑިފައެވެ.
މިދިޔަ މޭއި މަހުވެސް ހިތަދޫގެ ފެން ހޮޅިއެއް ފަޅައިގެން ގޮސްގެން މުޅި ރަށުން ފެން ކަނޑައިގެން ދިޔައެވެ.