މިރޭ ދަންވަރު ހުޅުމާލޭގައި ފަށާ ޓީއެފްޖީ ލޯންގް ރަންގެ ވެނިއު ޕާޓްނަރަކަށް ހުޅުމާލެ ބަލަހައްޓަމުންދާ އާބަންކޯ ހަމަޖެހިއްޖެއެވެ.
ރާއްޖޭގައި ބާއްވާ އެންމެ މަޤްބޫލު އެއް ދުވުން ކަމުގައިވާ ޓީއެފްޖީ ލޯންގްރަންގެ ހުރިހާ ދުވުމެއްވެސް ފަށާނީ ސެންޓްރަލް ޕާކު ސަރަހައްދުންނެވެ. މި ރޭހުގައި 5 ކިލޯމީޓަރ، 10 ކިލޯމީޓަރ، ހާފް މެރެތަން އަދި މެރެތަން، މި ކެޓެގަރީތަކުން އެތްލީޓުން ބައިވެރިވެފައި ވެއެވެ. މެރެތަން ރޭސް ފެށުމަށް ހަމަޖެހިފައިވަނީ ބުރާސްފަތި ދުވަހުގެރޭ މެންދަމު 2:00 ގައެވެ. ހާފް މެރެތަން ރޭސް ފެށޭނީ ފަތިހު 5:00 ގައެވެ. 10 ކިލޯމީޓަރުގެ ރޭސް ހުކުރު ދުވަހުގެ ހެނދުނު 6:00 ގައި ފަށާއިރު، 5 ކިލޯމީޓަރު ރޭސް ފެށުމަށް ހަމަޖެހިފައިވަނީ ހެނދުނު 7:00 ގައެވެ.
ޓީއެފްޖީއާއި ހަވާލާދީ އާބަންކޯއިން ބުނީ ރެޖިސްޓަރ ކުރުމަށް ފުރުސަތު ހުޅުވާލިތާ ކުޑަ ވަގުތު ކޮޅެއްގައި 1500 ބައިވެރިން މި ރަން ގައި ރަޖިސްޓަރ ވެފައިވާ ކަމަށެވެ. އަދި މިއީ މި އިވެންޓަށް އާއްމުންގެ ތަރުހީބު އޮތް ވަރު އަނގައިދޭ ކަމެކެވެ. މިއާއެކު މިހާ ގިނަ އަދަދެއްގެ ބައިވެރިންނާ އެކު މި ރަން ކަމިޔާބުކަމާ އެކު ކުރިއަށް ގެންދެވެނީ ގިނަ ފަރާތްތަކެއްގެ އެހީތެރިކަމާ ވެސް އެކީގައި ކަން ޓީއެފްޖީން ވަނީ ފާހަގަކޮށްފައެވެ.
މި ރޭސް ކުރިއަށް ގެންދިއުމަށް ވެނިއު ޕާޓްނަރ ގެ ހައިސިއްޔަތުން އާބަންކޯ ދަނީ ރޭސް އިންތިޒާމްކުރާ ފަރާތަށް އެހީތެރިކަން ފޯރުކޮށްދެމުން ކަމަށް އެކުންފުނިން ފާހަގަ ކުރެއެވެ. އަދި ހުޅުމާލޭގައި ކުރިއަށް ގެންދާ މިފަދަ ހުރިހައި ހަރަކާތެއްގައި އާބަންކޯގެ ސީއެސްއާރުން ފުރިހަމަ އެއްބާރުލުން ދީ، އެހީތެރިކަން ފޯރުކޮށްދެމުން ގެންދާނެ ކަމުގެ ޔަޤީންކަން އެކުންފުނިން ދެއެވެ.