ސަރުކާރު ކޯލިޝަން ޕީޕީއެމް/ޕީއެންސީގެ ޕްރައިމަރީގައި ތެރެއިން އަންނަ އަހަރުގެ މަޖިލިސް އިންތިހާބަށް ވާދަކުރާނެ މެމްބަރުން ހޯދަން މޯލްޑިވްސް ޑިވެލޮޕްމަންޓް އެލައިންސް އެމްޑީއޭ) އިން އިއުލާންކޮށްފި އެވެ.
މީދޫ ދާއިރާގެ މަޖިލިސް މެންބަރު އަދި ސަން ގްރޫޕްގެ ވެރިޔާ އަހުމަދު ސިޔާމް މުހައްމަދުގެ މި ޕާޓީ އަކީ ރިޔާސީ އިންތިހާބުފެ ދެވަނަ ބުރުގައި ރައީސް ޑރ. މުހައްމަދު މުއިއްޒަށް ތާއީދުކުރި ޕާޓީއެކެވެ. މީގެ އިތުރުން ކާނަލް މުހައްމަދު ނާޒިމްގެ މޯލްޑިވްސް ނެޝަނަލް ޕާޓީ އެމްއެމްޕީ) އަކީ ވެސް ދެވަނަ ބުރުގައި ޕީޕީއެމާ ކޯލިޝަން ހެދި ޕާޓީއެކެވެ
އަންނަ އަހަރު ބާއްވާ މަޖިލިސް އިންތިހާބުގައި ވާދަކުރާނެ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީ އަންނަ މަހުގެ 23 ގައި ބާއްވަން ސަރުކާރު ކޯލިޝަނުން ނިންމާފައިވާތީ، އެ ޕްރައިމަރީގެ ފުރުސަތު އެމްޑިއޭ އާއި އެމްއެންޕީ އަށް ވެސް ދީފައިވެ އެވެ.
އެހެންވެ އެމްޑީއޭ އިން ކުރި އިއުލާނެއް ބުނީ އެ ޕްރައިމަރީގައި އެ ޕާޓީގެ ފަރާތުން ވާދަކުރަން ޝައުގުވެރިވާ މެންބަރުންނަށް ކުރިމަތިލުމުގެ ފުރުސަތު އަަންނަ ހޯމަ ދުވަހާ ހަމައަށް ހުޅުވާލާފައިވާ ކަމަށެވެ. ޝައުގުވެރިވާ މީހުންގެ ޝަރުތުތަކުގެ ތެރޭގައި މި މަހުގެ 10 ގެ ނިޔަލަށް ޕާޓީގެ ދަފުތަރުގައި ހިމެނިފައިވާ މީހަކަށްވުމާއި ޕާޓީގެ ފަރާތުން އިންތިޚާބުގައި ވާދަނުކުރެވޭ ގޮތަށް އެއްވެސް ފިޔަވަޅެއް އަޅައިފައި ނުވާ މީހަކަށްވުމާއި ގާނޫނު އަސާސީންނާއި، ގާނޫނުތަކުން އެ އިންތިޚާބަކަށް ކުރިމަތިލާ ކެންޑިޑޭޓެއްގެ ކިބައިގައި ހުންނަންވާ ޝަރުތައް ފުރިހަމަވެފައިވާ މީހަކަށްވުމުގެ އިތުރަށް އަބުރުވެރި ނަޒާހަތްތެރި މީހެއް ކަމުގައިވުން ހިމެނެ އެވެ.
ޝައުގުވެރިވާ މީހުން ފޯމް ހުށަހަޅާނީ މި team.mda.office@gmail.com މެއިލަށެވެ. ފޯމް ޕާޓީގެ ވެބްސައިޓް mda.mv އިން ޑައުންލޯންޑް ކުރެވޭނެ އެވެ. ފޯމް ހުށަހެޅުމުގެ އެންމެ ފަހުން ސުންގަޑި އަކީ އެއީ ހޯމަ ދުވަހުގެ މެންދުރު ފަހު 2:00 ގެ ކުރި އެވެ.
ޕީޕީއެމް/ޕީއެންސީގެ ޕްރައިމަރީގައި ވާދަކުރާ މީހުންނަށް ކުރިމަތިލާން ދީފައ އޮތް ސުންގަޑި އަކީ މި މަހުގެ 11 އެވެ.