އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީސް (އައިސީޓީ) ގެ ދާއިރާ އަށް ބޮޑު ބަދަލެއް ގެންނަން ރާވާފައިވާ އެކަމަށް ކުރާ މަސައްކަތުގެ ތެރެއުން ފުވައްމުލަކުގައި ގައުމީ ޔުނިވަސިޓީގެ ކުންފުންޏާ އެކީ އެއްބަސްވުމެއްގައި ސޮއިކޮށްފި އެވެ.
ބުދަ ދުވަހު މި އެއްބަސްވުން ހެދީ އައްޑޫގެ ކުންފުންޏެއް ކަމަށްވާ ވެންޒާ ކޮމްޕަނީއާ އެކީގަ އެވެ. އެއްބަސްވުމުގައި ޔުނިވަސިޓީގެ ފަރާތުން ސޮއިކުރެއްވީ ވައިސް ޗާންސެލަރު، ޑރ. އާއިޝަތު ޝެހެނާޒު އާދަމެވެ. ވެންޒާ ކޮންޕަނީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަބްދުﷲ ހާނިސް މޫސާ އެވެ.
ގައުމީ ޔުނިވަސިޓީން ބުނީ 65 މިލިއަން ރުފިޔާ ޚަރަދުކޮށްގެން ހަދާ، އައިސީޓީ ފެސިލިޓީގައި ތިން ބައެއް ހިމެނޭނެ ކަމަށެވެ. އެއީ ކިޔަވައިދޭ ކުލާސްރޫމްތަކާއި ލެބްތަކަށް ޚާއްޞަ ބަޔަކާއި މުވައްޒަފުންނަށް ބޭނުންވާ އެކޮމޮޑޭޝަން ބަޔަކާއި ދަރިވަރުންނަށް ޚާއްޞަ ދަނާލެކެވެ. ދަނާލަކީ 21 ދަރިވަރުންގެ ޖާގައިގެ ތަނެކެވެ.
އެއްބަސްވުން ހެދީ މަސައްކަތް ފަށާތާ 30 މަސް ދުވަހުގެ ތެރޭގައި ނިންމާ ގޮތަށެވެ.
ޝެހެނާޒު ވިދާޅުވީ ފުވައްމުލަކުގައި ގާއިމުކުރާ އައިސީޓީ ފެސިލިޓީ އަކީ، އެ ދާއިރާ އިން ގައުމީ ޔުނިވަސިޓީން އަޅާ މުހިންމު ބިންގަލެއް ކަމަށާއި، އެތަން ވާނީ އެ ދާއިރާއިން ރާއްޖެއަށް ގެންނަ އިންގިލާބީ ބަދަލަކަށް ކަމަށެވެ. އޭނަ ވިދާޅުވި ގޮތުގައި ރާއްޖެ އިން ބޭރުގެ ދަރިވަރުންނަށް ވެސް އަމާޒުކޮށްގެން ހަދާ އައިސީޓީ ފެސިލިޓީގައި، އޮރަކަލް އެކެޑަމީ އާއި އެމޭޒަން އެކެޑަމީގެ އިތުރުން އީކޮމާސް ކައުންސިލުގެ ސެޓިފައިޑް ކޯސްތައް ހިންގާނެ އެވެ. އަދި އޭގެ އިތުރުން އެ ޔުނިވަސިޓީން ހިންގާ ސިސްކޯ ސެޓިފައިޑް ކޯސްތައް ވެސް އެ ހިންގާނެ ކަމަށެވެ.