ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދަން ހާއްސަ އޮޕަރޭޝަނެއް ހިންގަން ނިންމައިފި އެެވެ.
އިމިގްރޭޝަަނުން ބުނީ މި އޮޕަރޭޝަންތަކުގައި ބިދޭސީންގެ އައިޑެންޓިޓީ އާއި ވިސާ ޗެކްކުރުމަށް ފަހު، ގާނޫނާ ޚިލާފުވެފައިވާ ބިދޭސީންނަށް ފިޔަވަޅު އެޅުމާއި، ގަވައިދުގެ ތެރެއަށް ބިދޭސީން ފެއްތުމުގެ މަސައްކަތްތައް ކުރާނެ ކަމަށެވެ.
އެތަނުން ބުނީ މިފަދަ ހާއްސަ އޮޕަރޭޝަން ކުރިއަށް ގެންދަން ނިންމީ ރާއްޖޭގައި ގަވައިދާ ހިލާފަށް އުޅެމުންދާ ބިދޭސީން މަދުކުރުމާއި ރާއްޖޭގައި ދިރިއުޅޭ ބިދޭސީންގެ ކަންކަން ގަވައިދާ އެއްގޮތަށް ފައްތަން ކަމަށެވެ. އަދި މަސައްކަތްތަކުގައި ބިދޭސީން ގެންގުޅޭ ފަރާތްތަކާއި ސަރުކާރުގެ ވުޒާރާތަކާއި ބޭރުގެ އެމްބަސީތަކާއި ރައްޔިތުންނާއި އަދި މިކަމާ ގުޅުންހުރި އެންމެހާ ފަރާތްތައް ޝާމިލުކޮށްގެން ހަރުދަނާ ފިޔަވަޅުތަކެއް އެޅުން ވަރަށް މުހިއްމު ކަމަށް އިމިގްރޭޝަނުން ބުންޏެވެ.
އެހެންވެ މި ހާއްސަ އޮޕަރޭޝަން ކުރިއަށްދާ އިރު، އިމިގްރޭޝަންގެ ޤާނޫނާއި ޚިޅާފަށް ރާއްޖޭގައި މަސައްކަތް ކުރަމުންދާ ފަރާތްތަކާއި، ސައްހަ ހުއްދައެއް ނެތި ރާއްޖޭގައި ދިރިއުޅެމުންދާ ފަރާތްތަކުގެ މައްޗަށް އިމގްރޭޝަންގެ ޤާނޫނު ތަންފީޒު ކުރަމުންދާނެ ކަމަށް ބުންޏެވެ. އިމިގްރޭޝަންގެ އިއުލާނުގައި ބުނެފައިވެއެވެ.
ރާއްޖެ އަކީ ގިނަ އަދަދެއްގެ ބިދޭސީން އުޅެމުން އަންނަ ގައުމެކެވެ. ހާއްސަކޮށް ބަންގްލަދޭޝް މަސައްކަތްތެރިން ރާއްޖޭގެ އެކި ހިސާބުތަކުގައި ވަރަށް ގިނަ އަދަދަކަށް އުޅެ އެވެ. އެހެންވެ މީގެ ތެރޭގައި ގަވައިދާ ހިލާފަށް އުޅޭ މީހުންގެ މައްސަލަތައް ވަރަށް ގިނަ އެވެ.