މިއަދު މެނދުރުފަހު ގަމަށް ޖައްސަން އޮތް ފްލައިޓުން ގެންނަން ހަމަޖެހުނު އާރްއޯ ޕްލާންޓުގެ ސްޕެއަރ އެ ފްލައިޓުން ނުގެނެވޭ ކަން އައްޑޫ ލައިވް އަށް އެނގިއްޖެއެވެ.
އައްޑޫގެ ގުޅިފައިވާ ރައްތަކަށް ފެނުގެ ޚިދުމަތް ދިނުމަށް ޤާއިމްކޮށްފައިވާ ސެންޓަރަލް ޑީސެލިނޭޝަން ޕްލާންޓަށް ދިމާވި މައްސަލައަކާއި ގުޅިގެން އީއްޔެ ހެނދުނުން ފެށިގެން ފެނުގެ ޚިދުމަތް ވަނީ މެދު ކެނޑިފައެވެ. މި ޕްލާންޓުގެ ވީއެފްޑީ ޑްރައިވް ހަލާކުވުމުން އެ ބައި ހޯދާ އެއަަރ ފްރައިޓު ކުރުމުގެ މަސައްކަތް ފެނަކައިން ދަނީ ކުރަމުންނެވެ.
އެގޮތުން މިއަދު މެނދުރު ފަހު ފްލައިޓަށް އެ ބައި އަރުވާނެ ކަމަށް ފެނަކައިން ސޯޝަލް މީޑިއާގައި ކުރި ޕޯސްޓެއްގައި ވަނީ ހާމަކޮށްފައެވެ. ނަމަވެސް ގަމަށް ކާގޯ ނަގަން ދިޔައިރު، އެ ފްލައިޓުން އެ ބައި ގެނެވިފައި ނުވާކަން ވަނީ އެނގިފައެވެ. އަދި އެ ބައި ގެނެވޭނީ ހަވީރު އޮތް މޯލްޑިވިއަން ފްލައިޓުން ކަމަށް މައުލޫމާތު ލިބެއެވެ.
މިއާއެކު ފެނުގެ ޚިދުމަތް ނުލިބި އަނެއްކާވެސް އިތުރު 6 ގަޑިއެއް ހާއިރު ހޭދަވާނެ ކަމަށް ބެލެވެއެވެ. މިއަދު ފްލައިޓު ޝެޑިއުލްގައި ވާ ގޮތުން ދެން ގަމަށް ޖައްސަން އޮތީ މިއަދު އިރު އޮއްސި 6:20 ގައި ގަމަށް ޖައްސަން އޮތް ފްލައިޓެކެވެ. މައުލޫމާތު ލިބިފައިވާ ގޮތުގައި ދެން އެ ސްޕެއަރ ގެންނާނީ މި ފްލައިޓުންނެވެ.
އައްޑޫ ސިޓީގެ ގުޅިފައިވާ ރައްތަކުން ފެންކެޑިފައިވަނީ ޕަންޕްތަކަށް ކަރަންޓް ދިނުމަށް ބޭނުންކުރާ ނިޒާމަށް ދިމާވި މައްސަލައަކާއި ގުޅިގެން ކަމަށް ފެނަކައާއި ހަވާލާ ދީ އައްޑޫ ސިޓީ މޭޔަރ އަލީ ނިޒާރު ވިދާޅުވެއެވެ.
މައްސަލަ ހައްލު ކުރުމަށް ފެނަކަ މުވައްޒަފުން އީއްޔެއިން ފެށިގެން މަސައްކަތް ކުރަމުންދާއިރު، މައްސަލަ ދިމާވީ ޕްލާންޓުގެ ވީއެފްޑީ ޑްރައިވަށެވެ. އެ ބައި އައްޑޫއިން ލިބެން ނެތުމުން މާލެއިން ސްޕެއަރ ގެނެސް މަރާމާތު ކުރުމަށް ދަނީ މަސައްކަތް ކުރަމުންނެވެ.
އައްޑޫގެ ގުޅިފައިވާ ރައްތަކަށް ފެނުގެ ޚިދުމަތް ދޭ މި ޕްލާންޓުން، ކެނޑިގެން ރައްޔިތުންނަށް ވަނީ ބޮޑެތި ދަތިތަކާއި ކުރިމަތިވެފައެވެ. މި ޕްލާންޓުން ޚިދުމަތް ދެނީ ފޭދޫ، މަރަދޫ-ފޭދޫ، މަރަދޫ އަދި ހިތަދޫ އަށެވެ. އެގޮތަށް ދޭ އިރު ބައެއް ގޭގެއަށް ފެނުގެ ޚިދުމަތް އެއްކޮށް ގުޅާފައިވަނީ ސަޕްލައި ފެނަށެވެ. އެހެން ކަމުން އެ ގޭގެއަށް އެއްވެސް ވަރަކަށް ފެން ނުލިބެއެވެ