އައްޑޫ ސެންޓްރަލް ޑީސެލިނޭޝަން ޕްލާންޓަށް ބޭނުންވާ ސްޕެއާ އައްޑޫއަށް ގެނެސް މަރާމާތުގެ މަސައްކަތް ފަށައިފިއެވެ.
ސްޕެއަރ އައްޑޫއަށް ގެނެސްފައިވަނީ މިއަދު އިރުއޮއްސުނު އިރު މާލެއިން ގަމަށް ޖެއްސި ކާގޯ ފްލައިޓުންނެވެ. އީއްޔެ ހެނދުނުން ފެށިގެން ފެން ޕްލާންޓުގެ ޚިދުމަތް މެދު ކެނޑުމާއެކު އައްޑޫގެ ގުޅިފައިވާ ހުރިހާ ރަށަކަށް ދެމުންދިޔަ ސަޕްލައި ފެނުގެ ޚިދުމަތް ވަނީ މެދު ކެނޑިފައެވެ. ފެނަކަ ކޯޕަރޭޝަނުން ބުނީ، މައްސަލަ ދިމާވީ އާރްއޯ ޕްލާންޓުގެ ވީއެފްޑީއަށް ދިމާވި މައްސަލައެއްގެ ސަބަބުން ކަމަށެވެ. އޭގެ ސްޕެއަރ ގެންނަން ޖެހުނީ މާލެއިންނެވެ.
ފެނަަކައިން ފުރަތަމަ މަސައްކަތް ކުރީ މިއަދު މެނދުރު ސްޕެއަރ އައްޑޫއަށް ގެނައުމަށެވެ. ނަމަވެސް 75 ކިލޯގެ ވީއެފްޑީ ބަރުވުމުން އެ ފްލައިޓުން ނެގެނެވުނީ ކަމަށް ފެނަކައިން ފާހަގަ ކުރެއެވެ. އޭގެ ފަހުން އެންމެ އަވަހަށް ހަވީރު މާލެއިން ގަމަށް ފުރި ފްލައިޓަށް ވީއެފްޑީ އަރުވައި ވަނީ އައްޑޫއަށް ފޮނުވާފައެވެ.
ފެނަކައިން އައްޑޫ ބްރާންޗުން މިހާރު ސްޕެއަރ ލިބިފައިވާކަން ވަނީ ޔަޤީންކޮށްދީފައެވެ. އަދި އިތުރު މައްސަލައެއް ދިމާނުވާނަމަ، އެ ހަރުކޮށް މިރޭގެ އެންމެ ލަސްވެގެންވެސް ޕްލާންޓު ހިންގަން ފެށޭނެ ކަމަށް ފެނަކައިން ބުނެއެވެ.
އައްޑޫސިޓީގެ ގުޅިފައިވާ ރައްތަކުން ފެނުގެ ޚިދުމަތް ކެނޑު އީއްޔެ ހެނދުނުގެ ވަގުތެއްގައެވެ. ޚިދުމަތް މެދު ކެނޑުނީ ހިތަދޫގައި ހުންނަ ސެންޓްރަލް ޑީސެލިނޭޝަން ޕްލާންޓަށް ދިމާވި މައްސަލައަކާއި ގުޅިގެންނެވެ. މި ޕްލާންޓުން ހިތަދޫ، މަރަދޫ، މަރަދޫ-ފޭދޫ އަދި ފޭދޫއަށް ފެނުގެ ޚިދުމަތް ފޯރުކޮށްދެއެވެ. މިގޮތަށް ޚިދުމަތް ދޭއިރު، ގިނަ ގޭގެއަށް ފެނުގެ ޚިދުމަތް ފޯރުކޮށްދެއެވެ. އަދި ބައެއް ގެތަކުގައި އެއްކޮށްހެން ބޭނުން ކުރަނީ ސަޕްލައި ފެނެވެ.
މީގެ ސަބަބުން ބައެއް ފަރާތްތަކަށް ފެން ނުލިބި 30 ގަޑިއިރަށް ވުރެ ގިނަ އިރު ވަނީ ވެފައެވެ.