އައްޑޫ ޕޮލިސް ކޮލެޖްގެ ވެރިއަކަށް އެސިސްޓެންޓް ކޮމިޝަނަރު ޔޫނުސް ސޮބާހު ހަމަޖައްސައިފި އެވެ.
ބުދަ ދުވަހު އައްޑޫ ޕޮލިސް ކޮލެޖަށް ޔޫނުސް ބަދަލުކުރެއްވީ އޭނަ ކުރިން ހުންނެވި ޕޮލިސް ކޮމިޝަނަރު ބިއުރޯގެ މަގާމަށް، ޕޮލިސް ކޮލެޖްގެ ވެރިއަކަށް މިދިޔަ އަހަރުން ފެށިގެން ހުންނެވި އަހުމަދު ޝިފާން ބަދަލުކުރުމަށް ފަހު އެވެ.
މިދިޔަ އަހަރުގެ މާޗް 27 ގައި ހުޅުވި ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓް (އެންސީޕީއެލްއީ) ގެ މަގާމަށް ޝިފާން ހަމަޖެއްސީ މިދިޔަ އަހަރުގެ މެއި މަހުގެ 31 ގަ އެވެ. އޭނަ އަކީ ކުރިން އައްޑު އާއި ފުވައްމުލައް ހިމެނޭ ފުލުހުންގެ ސައުތު ޑިވިޝަން ކޮމާންޑަރުކަން ވެސް ކުރައްވާފައިވާ ބޭފުޅެކެވެ. އެ މަގާމަށް ޝިފާން ހަމަޖެއްސީ 2013 ގަ އެވެ.
އައްޑޫ ޕޮލިސް ކޮލެޖްގެ ހެޑަކަށް ޝިފާން ހަމަޖެއްސުމުގެ ކުރިން ހުންނެވީ މާލެ އޭރިއާ 1 (މާލޭ ސިޓީ ޕޮލިސް) ގެ ހެޑްގެ މަގާމުގަ އެވެ.
ޔޫނުސް އަކީ ވެސް ކުރިން އައްޑޫގައި މަސައްކަތްކުރެއްވި ބޭފުޅެކެވެ. އޭނަ 2013 ގައި ފުލުހުންގެ ހިދުމަތުން ވަކިވެވަޑައިގެންނެވި އެވެ. އަދި އަލުން ފުލުހުންގެ ހިދުމަތާ ގުޅިވަޑައިގަތީ ކުރީގެ ރައީސް އިބްރާހީމް މުހައްމަދު ސޯލިހްގެ ވެރިކަމުގަ އެވެ.