ރައީސް ޑރ. މުހައްމަދު މުއިއްޒު ސަރުކާރު ހިންގަވަން ފެއްޓެވި ފަހުން ރައީސް އޮފީހަށް އަދި ތަރުޖަމާނަކު މުހިއްމު ނޫން ކަމަށް ބުނެފި އެވެ.
އެ މަގާމަށް މީހަކު ހަމަނުޖައްސައި ދިގުލާތީ އަމާޒުވެފައިވާ ފާޑުކިޔުންތަކާ ގުޅިގެން ރައީސް އޮފީހުގެ މިނިސްޓަރު އިބްރާހީމް ހަލީލު ވިދާޅުވީ މި ވަގުތު ރައީސް އޮފީހުގައި ތަރުޖަމާނެއް ހުރުން ކޮންމެހެން ލާޒިމު ނޫން ކަމަށެވެ. އެކަމަކު އެ މަގާމަށް މީހަކު އައްޔަންކުރާނެ ކަމަށް އޭނަ ވިދާޅުވި އެވެ.
ނަމަވެސް އެއީ ކިހާ ތާކު ކަމެއް ވިދާޅެއް ނުވެ އެވެ.
ހަލީލު ވިދާޅުވި ގޮތުގައި ރައީސް އޮފީހުގައި ތަރުޖަމާނަކު ނެތަސް ސަރުކާރުން ހާމަކުރަން ބޭނުންވާ މައުލޫމާތު ހާމަކުރަމުން ދާނެ އެވެ. އޭނަ ވިދާޅުވީ "މި ސަރުކާރުގެ ސިޔާސަތަކީ ސަރުކާރުން ހާމަކުރަން ބޭނުން ކޮންމެ ވާހަކައެއް ތަރުޖަމާނު ލައްވައި ދެއްކުމެއް ނޫން" ކަމަށެވެ.
ރައީސް އޮފީހުގެ ތަރުޖަމާނުގެ އެންމެ ފަހުން އަދާކުރެއްވީ ރައީސް އިބްރާހީމް މުހައްމަދު ސޯލިހުގެ ވެރިކަމުގައި މިއުވާން މުހައްމަދެވެ. އޭނަ ކުރިން އެ ސަރުކާރުގެ ތަރުޖަމާނުކަން މަބްރޫކް އަޒީޒު އަދާކުރެއްވި އެވެ.
ރައީސް މުއިއްޒު ވިދާޅުވެފައިވާ ގޮތުގައި މި ސަރުކާރަކީ މައުލޫމާތުތައް ހާމަކުރާނެ ދެފުށްފެންނަ ސަރުކާރަކަށް ވާނެ ކަމަށެވެ. އެގޮތުން މިދިޔަ ހަފުތާގައި ރައީސް ނޫސްވެރިންނާ ބައްދަލު ކުރައްވައި ސަރުކާރުގެ އެކި ނިންމުންތަކާ ބެހޭ މައުލޫމާތު ހިއްސާކުރައްވާފައިވެ އެވެ.