މާލޭގެ މޭޔަރު ހޮވަން އަންނަ ބާއްވާ ބައި-އިލެކްޝަންގައި އަމިއްލަ ގޮތުން ކެންޑިޑޭޓަކު ވާދަކުރަން ހުށަހަޅާފައިވާ ކަމަށް އިލެކްޝަން ކޮމިޝަން އީސީ) އިން ބުނެފި އެވެ.
އެ ކޮމިޝަންގެ ނައިބު އިސްމާއީލް ހަބީބު ރައީސް ވިދާޅުވީ އަންމަ މަހު ބާއްވާ އިންތިހާބުގައި ވާދަކުރަން މިހާތަނަށް ފޯމު ހުށަހެޅީ ވެސް އެ ކެންޑިޑޭޓް އެކަނި ކަމަށެވެ. އަދި އޭނަގެ ފޯމު ބަލައިގަނެ، އެ ސައްހަ ކަމަށް ވެސް ނިންމާފައިވާ ކަމަށް ވިދާޅުވި އެވެ. އެކަމަކު އެއީ ކޮން ބޭފުޅެއް ކަމެއް ހަބީބު ވިދާޅެއް ނުވެ އެވެ.
މޭޔަރު ކަމަށް ވާދަކުރައްވާ ކެންޑިޑޭޓުން ފޯމު ހުށަހެޅުމުގެ އެންމެ ފަހު ސުންގަޑި އަކީ އަންނަ ބުދަ ދުވަހުގެ މެންދުރު ފަހު 2:00 އެވެ.
2024 ޖެނުއަރީ 13 ގައި، ބޭއްވުމަށް ހަމަޖެހިފައިވާ، މާލެ ސިޓީ މޭޔަރުކަމުގެ މަޤާމަށް ކުރިމަތިލުމަށް އެދޭ މީހުން، އެޕްލިކޭޝަން ހުށަހެޅުމުގެ ފުރުޞަތު 2023 ޑިސެންބަރު 13 ވާ ބުދަ ދުވަހުގެ 14:00 ގެ ނިޔަލަށް ހަމަވާނެ.
މިހާތަނަށް މާލޭ ސިޓީ މޭޔަރުކަމުގެ މަޤާމަށް ކުރިމަތިލުމަށް،…— Ismail Habeeb (@IsmailHabeeb) December 9, 2023
މި އިންތިހާބުގައި ޕާޓީތަކުން ވާދަކުރައްވަން ނިންމާފައިވާ ބޭފުޅުންނަކީ ޕީޕީއެމް/ޕީއެންސީގެ ޓިކެޓްގައި ވާދަކުރައްވާ ކުރީގެ އެޓާނީ ޖެނެރަލް އާޒިމާ ޝަކޫރާއި އެމްޑީޕީގެ ޓިކެޓްގައި ވާދަކުރައްވާ އެމްޓީސީސީގެ ކުރީގެ ސީއީއޯ އާދަމް އާޒިމާއި ޑިމޮކްރެޓްސްގެ ފަރާތުން ވާދަކުރައްވާ ސައިފް ފާތިހުގެ އިތުރުން އަލަށް އުފައްދަން މަސައްކަތްކުރާ ޕީއެންއެފްގެ ފަރާތުން ވާދަކުރައްވާ ކުރީގެ ޕޮލިސް ކޮމިޝަނަރު ހުސައިން ވަހީދެވެ.
މާލޭގެ މޭޔަރުގެ މަގާމު ހުސްވީ އެ މަގާމުގައި ހުންނެވި މިހާރުގެ ރައީސް ޑރ. މުހައްމަދު މުއިއްޒު ރިޔާސީ އިންތިހާބު ކާމިޔާބު ކުރެއްވުމާ ގުޅިގެންނެވެ.
މޭޔަރު ހޮވަން ބާއްވާ ބައި-އިލެކްޝަން އޮންނާނީ އަންނަ މަހުގެ 13 ގަ އެވެެ