ވެލާނާ އެއާޕޯޓުން އެތެރޭގެ އުދުހުންތަކަށް ޚިދުމަތް ހޯދާ ފަސިންޖަރުންނަށް ހާއްސަކޮށް ޓެކްސީ ޑްރޮޕް-އޮފް ޕޮއިންޓެއް ޤާއިމް ކޮށްފިއެވެ.
ވެލާނާ އެއާޕޯޓުގެ ޑޮމެސްޓިކް ޓާމިނަލް ޑްރޮޕް އޮފް ޕޮއިންޓް އިފްތިތާހް ކޮށްދެއްވުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް-އެމްއޭސީއެލްގެ މެނޭޖިންގް ޑިރެކްޓަރ އިބްރާހިމް ޝަރީފް ވަޑައިގެންނެވިއެވެ. މި ބަދަލާއި ގުޅޭގޮތުން އެ ސަރަހައްދުގައި ނޫސްވެރިންނަށް މައުލޫމާތު ދެއްވަމުން ޝަރީފް ވިދާޅުވީ، މިއީ ޚިދުމަތް ހޯދާ ފަރާތްތަކަށް ވީހާވެސް ލުއިފަސޭހަކޮށްދިނުމަށްޓަކައި އެމްއޭސީއެލްގެ މެނޭޖްމަންޓުން މަޝްވަރާކުރެއްވުމަށްފަހު ނިންމަވާފައިވާ ނިންމެވުމެއްކަމަށެވެ. އަދި މިބަދަލު ގެނައުމަށް ނިންމާފައިވަނީ އެއަރޕޯޓުގެ އޮޕަރޭޝަންގައި ބާރު ބޮޑުނުވާނެގޮތަށް ބަލައިގެންކަމަށްވެސް ވިދާޅުވިއެވެ.
މީގެ ކުރިން ޓެކްސީ ޑްރޮޕް-އޮފް ޕޮއިންޓް ހަމަ އެކަނި ޤާއިމް ކުރެވިފައިވަނީ އިންޓަނޭޝަނަލަ ޓާމިނަލާއި ކައިރީގައެވެ. އެހެންވެ އެތަނުން ލަގެޖް ހިފައިގެން ޑޮމެސްޓިކް ޓާމިނަލަށް ދާން ޖެހެނީ ހިނގާފައެވެ.
މި ބަދަލާއެކު ވެލާނާ އެއާޕޯޓުގެ ޑޮމެސްޓިކް ޓާމިނަލްގެ އުތުރު ކަންމަތިން ޓެކްސީ ނުވަތަ ޕްރައިވެޓް ކާރު މަޑު ކުރާ ސަރަހައްދެއް ޤާއިމް ކުރެވިފައިވާނެއެވެ. މި ކަމުގެ ސަބަބުން ކުރީގެ ޓެކްސީ ޕިކަޕް އަދި ޑްރޮޕް އޮފް ޕޮއިންޓަށް ބަދަލެއް ނާންނާނެ ކަމަށް އެމްއޭސީއެލްއިން ބުނެއެވެ. އަދި މި ސަރަހައްދުގައި އެމްއޭސީއެލް މުވައްޒަފުންނާއި ފުލުހުން ޓްރެފިކް ބެލެހެއްޓުމުގައި ހަރަކާތްތެރިވާއިރު، މަގު ދައްކައި ދާންވީ ގޮތް އަންގައިދޭ ބޯޑުތައްވެސް ހަރުކުރެވިފައިވާ ވާނެ ކަމަށް އެމްއޭސީއެލްއިން ބުނެއެވެ.
އެމްއޭސީއެލްއިން ވަނީ އެއާޕޯޓު މަގުތަކުގެ މަސައްކަތް ނިމޭއިރު ކުރިއަށް އޮތް ތަނުގައި ޑޮމެސްޓިކް ޓާމިނަލަށްވެސް ޓެކްސީ ކިއުއެއް ހަމަޖެހޭނެކަން ފާހަގަކޮށްފައެވެ. މިހާރު ޑޮމެސްޓިކް އެރައިވަލްއަށް އަންނަ ފަރާތްތަކުންވެސް ޓެކްސީއެއް ބޭނުންވެއްޖެ ނަމަ ދާން ޖެހެނީ އިންޓަނޭޝަނަލް ޓާމިނަލް ފަސްކޮށް އޮންނަ ޓެކްސީ ކިއުއަށެވެ.