އަލަށް ތައާރަފްކުރާ ފަސް ރުފިޔާގެ ކޮއިނަނާ އެކު މިހާރު ބޭނުން ކުރަމުން އަންނަ ދެ ރުފިޔާގެ ބަދަލުގައި ލުއި ރުފިޔާތަކެއް ތައާރަފު ކުރުމަށް ނިންމާފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.
އެމްއެމްއޭ އިން ބުނީ ވިސްނުން ހުރީ އަލަށް ތައްޔާރު ކުރާ ފަސް ރުފިޔާ ކޮއިނާ އެކު މިހާރު ބޭނުން ކުރާ ދެ ރުފިޔާގެ ކޮއިން ސްޓޮކް ހުސްވުމުން އަލަށް އުފައްދާ ދެ ރުފިޔާގެ ކޮއިން، މިހާރުގެ ކޮއިނަށް ވުރެ ލުއިކޮށް ތައްޔާރު ކުރުން ކަމަށެވެ.
މަރުކަޒީ ބޭންކުން ބުނީ ކޮއިން ބަރުކޮށް ބެހެއްޓުމުގެ ވިސްނުމެއް ނުގެންގުޅޭ ކަމަށެވެ. އަދި ބޭނުން ވަނީ ދެ ރުފިޔާގެ ކޮއިން ލުއި ކުރަން ކަމަށް ބުންޏެވެ.
މި އަހަރަކީ ރާއްޖޭގެ މިނިވަންކަމަށް 50 އަހަރު ފުރޭ އަހަރަށްވުމާ އެކު، ރާއްޖޭގައި މިހާރު ބޭނުން ކުރަމުން އަންނަ ފައިސާ އަށް މި އަހަރުގެ ތެރޭގައި ބޮޑެތި ބަދަލުތަކެއް އަންނާނެ އެވެ.
އެގޮތުން 1،000ރ. ގެ ނޫޓެއް ވެސް ތައާރަފު ކުރަން އެމްއެމްއޭ އިން ވަނީ ނިންމައިފަ އެވެ.