ދިވެހިންގެ އަތުން މަސްވެރިކަން ބީވެ، ބޭރު މީހުންގެ އަތްމައްޗަށް އެ މަސައްކަތް ހިނގައިދާނެކަމުގެ ބިރު މިހާރު ވަރަށް ބޮޑަށް އޮތް ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
މިއަދު ފާހަގަކުރަމުން އަންނަ މަސްވެރިންގެ ދުވަހުގެ ތަހުނިޔާ އެ ދާއިރާގައި މީހުންނަށް ފޮނުއްވައި ސޯޝަލް މީޑިއާ ޕޯސްޓެއްގައި ޖަމީލު ވިދާޅުވީ ދިވެހި ކާބަފައިން ދަސްކޮށްދިން މި އަގު ބޮޑު މަސައްކަތް ދަމަހައްޓަން އިތުރު ވިސްނުން ނެރެން ޖެހޭ ކަމަށެވެ.
"މަސްވެރިކަން ދިވެހި ދަރިންގެ އަތްމަތިން ބީވެ ގޮސް ބޭރު މީހުންގެ އަތްމައްޗަށް ފުރޮޅިގެން ދިއުމުގެ ބިރަކީ މިއަދު ޙަގީގަތެއް،" އޭނަ ވިދާޅުވި އެވެ. "މިއަދު މި މަސައްކަތް ދިވެހިންގެ އަތްމަތީގައި އޮވެދާނެ ކަމާމެދު ސުވާލު އުފެދޭ."
ފަހަކަށް އައިސް ރާއްޖޭގައި މަސްވެރިކަމުގައި ބިދޭސީން އުޅެމުންދާކަން ފާހަގަކުރެވެ އެވެ. އަދި މިކަމުގެ ކަންބޮޑުވުން ގިނަ ބަޔަކު ފާޅުކުރެ އެވެ.
މަސްވެރިކަމަކީ ކުރިން ދިވެހިން ލޭނާރެވެ. ނަމަވެސް އެއީ މިހާރު ރާއްޖޭގެ އިގުތިސާދުގެ ދެވަނަ ސިނާއަތެވެ. މިހާރު ރާއްޖޭގެ އިގުތިސާދުގެ މައި ސިނާއަތަކީ ޓޫރިޒަމެވެ.