މިފްކޯގެ ބޯޑުން ކުރިއަށް އޮތްތަނުގައި ކަންކަން ނިންމާއިރު މަސްވެރިންގެ ބަސް އެކަމުގައި ހިމެނޭނޭ ކަމަށް ރައީސުލްޖުމުހޫއްރީއްޔާ ޑރ. މުހައްމަދު މުއިއްޒު ވިދާޅުވިއެވެ.
މަސްވެރިންގެ ދުވަހުގެ މުނާސަބަތުގައި ބާއްވާ ހާއްސަ ޖަލްސާގައި ވާހަކަ ދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ، އެމަނިކުފާނުގެ މެނިފެސްޓޯގައި މަސްވެރިންނަށް ހާއްސަ އިސްކަމެއް ދީފައިވާކަން ފާހަގަ ކުރެއްވިއެވެ. އަދި ސަރުކާރުގެ ސިޔާސަތުތައް ކަނޑައެޅުމާއި މަސްވެރިންގެ ލާބައާއި މަންފާއަށް ކަންކަން ކުރުމުގައި މަސްވެރިންގެ ބަހަށް އަދި ބައިވެރިވުމަށް އަބަދުވެސް ސަމާލުކަން ދޭނެ ކަމަށް ވިދާޅުވިއެވެ.
މިގޮތުން ސަރުކާރުގެ ފުރަތަމަ ކެބިނެޓް ބައްދަލުވުމުގައި މިފްކޯ ސައްތައިން ސައްތަ ދިވެހި ކުންފުންޏަކަށް ބަދަލު ކުރުމުގެ އެއްބޭނުމަކީ މަސްވެރިންގެ ބަސް ހިމެނުން ކަމަށް ވިދާޅުވިއެވެ.
" މި ބަދަލު ގެނައުމުގެ އެންމެ ބޮޑު އެއް ބޭނުމަކީ މިފްކޯގެ ބޯޑުން ކަންކަން ނިންމޭއިރު، މަސްވެރިންގެ ބަސް. މަސްވެރިންގެ އަޑު އެކަމުގައި ހިމެނުން. އެކަމަށްޓަކައި މިފްކޯގެ ބޯޑުގައި މަސްވެރިންގެ ބައިވެރިވުން ސީދާ ހިމެނޭގޮތަށް އެ ބޯޑުގައި މަސްވެރިން ތަމްސީލު ކުރާނެ. " ރައީސް ވިދާޅުވިއެވެ.
އަދި މިފްކޯގެ ސިޔާސަތު ކަނޑައެޅުމުގައި އަދި މަސްވެރިންގެ ހައްޤުތައް ކަށަވަރުވާ ގޮތަށް ބޯޑުގައި މަސްވެރިން ތަމްސީލު ވާނެ ކަމަށް ރައީސް ވިދާޅުވިއެވެ.
"މިފްކޯ ތަރައްޤީ ކުރުމުގައި އަދި މިފްކޯގެ ސިޔާސަތުތައް ކަނޑައެޅުމުގައި އަދި މިފްކޯގެ ޕްރޮގްރާމްތައް ހިންގުމުގައި މަސްވެރިންގެ ސީދާ ބަސް ކިޔާ ގޮތަށް މަސްވެރިންގެ ހައްޤުތައް ހޯދުމުގައި މަސްވެރިންގެ ބައިވެރިވުން އޮންނަ ގޮތަށް ކަންކަން ބައްޓަން ވާނީ. ސަބަބަކީ އަޅުގަނޑު ޤަބޫލު ކުރާ ގޮތުގައި އެފަންނަކަށް ގެންނަން ޖެހޭ އެންމެ ރަނގަޅު ބަދަލެއް އެނގޭނީ ސީދާ އެފަންނެއްގެ ޢަމަލީ ތަޖުރިބާ ލިބިފައިވާ ބަޔަކަށް. " ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނުގެ އަރިހުގައި މަސްވެރިންނަކީ ވަރަށް އަގުހުރި ބައެއް ކަމަށާއި، ރާއްޖޭގެ ކަނޑުފަޅުގެ ހަޤީޤީ އިލްމުވެރިންނަކީ އެއީ ކަމަށް ވިދާޅުވިއެވެ.
މިފްކޯގެ ބޯޑުގައި މަސްވެރިން ތަމްސީލު ކުރާނީ މަސްވެިރންގެ ހާއްސަ ކޯޕަރޭޓިވް އަކުންނެވެ. އަދި ބޯޑުގައި އެ ކޯޕަރޭޓިވް ޝާމިލްވާނެ ކަމަށް ފިޝަރީޒް މިނިސްޓަރ ވަނީ ވިދާޅުވެފައެވެ.