އައްޑޫސިޓީ ހިތަދޫ ފިހާރައަކަށް ވަދެ ބިރުދައްކައިގެން ފޭރުނު 36 އަހަރުގެ ފިރިހެނަކު ފުލުހުންގެ ބެލުމުގެ ދަށަށް ގެންގޮސްފިއެވެ.
މި ހާދިސާގެ މައުލޫމާތު ފުލުހުންނަށް ރިޕޯޓުކޮށްފައިވަނީ މިއަދު މެނދުރުފަހު 15:10 ހާއިރު ކަމަށް ފުލުހުން ބުނެއެވެ. މިމައްސަލާގައި ތުހުމަތު ކުރެވޭ މީހާ ފުލުހުންގެ ބެލުމުގެ ދަށަށް ގެނެސް ފާސް ކުރުމުން އޭނާ އަތުން މަސްތުވާ ތަކެތި ކަމަށް ޝައްކު ކުރެވޭ 18 ޕެކެޓް ފެނިފައިވާ ކަމަށް ފުލުހުން ބުނެއެވެ. އަދި ފޭރުމުގައި އޭނާ ބޭނުން ކުރި ކަމަށް ބެލޭވޭ ވަޅި އޭނާ އަތުން ފެނިފައިވާ ކަމަށް ފުލުހުން ބުނެއެވެ.
މިމައްސަލަ ހިތަދޫ ޕޮލިސް ސްޓޭޝަނުން މިހާރު ތަހުޤީގު ކުރަމުންދާއިރު، ވައްކަމާއި ފޭރުމުގެ މައްސަލަތައް މިފަހަކަށް އައިސް ވަނީ ވަރަށް ބޮޑަށް އިތުރުވެފައެވެ. އެގޮތުން ފިހާރަތަކަށް ވަދެ ބިރު ދައްކައިގެން ފައިސާ ފޭރިގެން ދިއުމާއި، އަދި ފިހާރަތައް ނިންމާ ނިކުންނަ ވިޔަފާރި ވެރިންނަށް ފާރަލައިގެން ފޭރުމުގެ މައްސަލަތެއް ވެސް ވަނީ ފެންމަތިވެފައެވެ.
މިފަދަ މައްސަލަތަކެއް ފެންމަތިވެފައިވާއިރު، މިކަންކަން ހުއްޓުވުމަށް ފުލުހުން ހާއްސަ އޮޕަރޭޝަނެއް ހިންގަމުންދާ ކަމަށް ފުލުހުން ބުނުނެއެވެ. އެގޮތުން މިފަދަ ޢަމަލުތައް ހިންގާ ފަރާތްތަކާއި ގުޅޭ އެއްވެސް މައުލޫމާތެއް އެނގޭ ފަރާތެއް ވާނަމަ، އެ މައުލޫމާތެއް ފުލުހުންނާއި ހިއްސާ ކުރުމަށް ފުލުހުން ވަނީ އިލްތިމާސް ކޮށްފައެވެ.