އެން މުޅަވުމުގެ މައްސަލަ ހައްލު ކުރަން އައްޑޫ ދޯންޏެއްގައި ދިރާސާ މަސައްކަތްތަކެއް ކުރެވެމުން ދާ ކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެ އެވެ.
މިރޭ ބޭއްވި 43 ވަނަ މަސްވެރިންގެ ދުވަހުގެ ޖަލްސާގައި ވާހަކަ ދައްކަވަމުން ރައީސް ޑރ. މުހައްމަދު މުޢިއްޒު ވަނީ އެންވެރިކަމުގެ ދައިރާ އަކީ މިޒަމާނަށް ބަލާއިރު ވަރަށް ބޮޑަށް ތަރައްޤީ ކުރަން ޖެހިފައިވާ ދައިރާއެއް ކަމަށެވެ. އަދި އެމަނިކުފާނު ބޭނުންވަނީ މިކަންވެސް ޒަމާނީ ފަންނީއްޔާތު ނުވަތަ ޓެކްނޮލޮޖީއާއި ގުޅުވާލުމަށް ކަމަށް ވިދާޅުވިއެވެ. އަދި އިލްމީ އަސާސެއްގެ މައްޗަށް ދިވެހި އެންވެރިކަން ބިނާ ކުރަން ބޭނުންވާކަން ރައީސް ފާހަގަ ކުރެއްވިއެވެ.
ރައީސް ވަނީ އެން ދިރުވައި އާލާކޮށް ގިނަ ވަގުތު ބެހެއްޓޭ ގޮތަށް ހެދުމަށާއި އެން އިސްރާފު ކުރެވޭ މިންވަރު މަދު ކުރުމަށް ތަފާތު ޕްރޮގްރާމްތަކެއް މިހާރު ފެށިފައިވާ ކަމަށް ވިދާޅުވިއެވެ.
"އޭގެ ތެރޭގައި ބޭރުގެ ހިލޭ އެހީގެ ދަށުން އައްޑޫ އޮތޮޅުގެ ދޯންޏެއްގެ އެންވަތް ބަދަލުކޮށް، އެން ގިނަ ވަގުތު ބެހެއްޓޭތޯ ބެލުމުގެ ދިރާސާ މަސައްކަތް ވަނީ ފެށިފައި. " ރައީސް ވިދާޅުވިއެވެ.
ރައީސް ވަނީ މިއާއެކު އެންވަތުގެ ޑިޒައިނަށް ބަދަލު ގެންނަން ބޭނުންވާ އޮޑިވެރިންނަށް އެކަމުގެ މާލީ އެހީތެރިކަން ލިބިގެންދާނެ ކަމަށްވެސް ވިދާޅުވެފައެވެ. މިއާއި އެކު ޒަމާނުއްސުރެއް ދިވެހި ތަހައްމަލު ކުރަމުން އަންނަ އެން މުޅަ ވުމުގެ މައްސަލައެއް ހައްލެއް ގެނެވޭނެ ކަމަށް ރައީސް ވިދާޅުވިއެވެ.
އެމަނިކުފާނު ވަނީ އެވޭލާ ޒަމާނުގައި އެންވަރިކަން ކުރަމުން އައި ގޮތަށްވެސް އަލި އަޅުވާލާފައެވެ. އަދި އެންމަކީ މާކަނޑަށް ނުކުމެ ރަނގަޅު މަސްވެރިކަމެއް ކުރުމރަށް މުހިންމު ކަމެއްގެ ގޮތުގައި ވަނީ ފާހަގަކޮށްފައެވެ.