ރާއްޖޭގެ މަސްވެރިކަމުގެ ސިނާއަތަށް ބޭނުން ވަނީ އެ ސިނާއަތުގެ ފައިދާ ބޮޑަށް ނެގޭނެ ޖުމްލަ ހައްލެއް ކަމަށާއި މި ސަރުކާރުން އެއްވެސް ބާވަތެއްގެ މަސްވެރިކަން ބާކީ ނުކުރާނެކަމުގެ ޔަގީންކަން ދެއްވާ ކަމަށް ފިޝަރީޒް މިނިސްޓަރު އަހުމަދު ޝިޔާމު ވިދާޅުވެއްޖެ އެވެ.
އިއްޔެ ފާހަގަކުރި 43 ވަނަ މަސްވެރިންގެ ދުވަހާ ގުޅުވައިގެން ރޭ ބޭއްވި ޖަލްސާގައި މިނިސްޓަރު ވިދާޅުވީ މަސްވެރިކަމުގެ ސިނާޢަތަށް ޖުމްލަ ޙައްލެއް ގެންނާނީ ހުރިހާ ބާވަތެއްގެ މަސްވެރިކަން ވެސް ހިމެނޭ ގޮތަށް ކަމަށެވެ.
"ފަރުމަސްވެރިކަން ކުރާ ފަރާތްތައް އެބަ ވިދާޅުވޭ، ތިމަންނަމެން މީ އުޅޭ ބައެއްކަން ނޭގެނީތޯ. ފާނަ މަސްވެރިކަން ކުރާ ފަރާތްތައް ވެސް މިހެން ވިދާޅުވޭ. އަޅުގަނޑުމެން މި މަސައްކަތް ކުރަނީ ޖުމަލް ހައްލެއް ހޯދައި ދިނުމަށް،" ޝިޔާމު ވިދާޅުވި އެވެ. "އެއްވެސް ބާވަތެއްގެ މަސްވެރިކަން ކުރާ ފަރާތެއް ބާކީއެއް ނުވާނެ. މަސްވެރިކަމާއި ކަނޑުތަކުގެ ވަސީލަތްތަކުގެ ބޭނުން ވީހާ ވެސް ބޮޑަށް ހިފޭނެ ގޮތަށް މި ސަރުކާރުގެ މަސްވެރިކަމުގެ ސިޔާސަތު އޮންނާނީ."
މިނިސްޓަރު ވިދާޅުވި ގޮތުގައި ފިޝަރީޒް މިނިސްޓްރީގެ މެންޑޭޓަށް ގެނެސްފައިވާ ބަދަލާއެކު މަސްވެރިކަމާ ގުޅުން ހުރި އިތުރު ދެނެގަނެ، އޭގެ މަންފާ ހޯދުމަށް މަސައްކަތް ކުރާނެ އެވެ.
ޝިޔާމު ވިދާޅުވި ގޮތުގައި މަސްވެރިކަން ކުރިއެރުވުމަށްޓަކައި މަސްވެރިންނަށް ދިމާވެފައި ހުރި ދަތިތަކާއި ގޮންޖެހުންތަކަށް އަވަސް ހައްލުތަކެއް ހޯދައި ދޭން ސަރުކާރުން މަސައްކަތް ކުރާނެ އެވެ. އެގޮތުން ބާނާ މަސް އަވަހަށް ކިރުވޭނެ ގޮތް ހެދުމާއި ކިރުވާ މަހަށް އަވަހަށް ފައިސާ ލިބޭނެ އިންތިޒާމާއި އައިސް ލިބޭނެ އިތުރު ވަސީލަތްތަކާއި ސްޓޯރޭޖްގެ ދަތިކަން ފަދަ ކަންކަމަށް މި ސަރުކާރުން ޖުމްލަ ހައްލެއް ހޯދައި ދޭނެ އެވެ.