މިހާރު ވަރަށް ބޮޑެތި ގެއްލުންތަކެއްފައި ލިބިފައި އޮތް އައްޑޫ ސްޓޭޑިއަމް މަރާމާތުކޮށް ދޭނެ ބަޔަކު ހޯދަން ސްޕޯޓްސް މިނިސްޓްރީން ހުޅުވާލައިފި އެވެ.
އެ މިނިސްޓްރީން ބުނީ މި މަސައްކަތްކޮށް ދޭން ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ މި މަހުގެ 19 ވަނަ ދުވަހާ ހަމައަށް ހުޅުވާލާފައިވާ ކަމަށެވެ. ހިތަދޫގައި އޮންނަ އައްޑޫ ސްޓޭޑިއަމް މަރާމާތު ކުރާނެ ބަޔަކު ހޯދަން އިއުލާންކުރި އިރު، އަންނަ އަހަރު އިންޓަ-ސްކޫލް އެތުލެޓިކްސް މީޓްސް އައްޑޫގައި ބާއްވަން ނިންމާފައިވެ އެވެ.
އައްޑޫގައި ބާއްވާ ބޮޑެތި ކުޅިވަރުތައް ބާއްވަނީ ސްޓޭޑިއަމްގަ އެވެ.
އައްޑޫގައި ބޮޑެތި ކުޅިވަރު މުބާރާތް ބާއްވަމުން އަންނަ ސްޓޭޑިއަމްގެ ހާލަތު ވަރަށް ދަށްވެ، އެތަނުގެ މިހާރުގެ ހާލަތުގެ ވާހަކަ މިދިޔަ އަހަރުގެ ފަހުކޮޅު ކައުންސިލަރަކު ސޯޝަލް މީޑިއާގައި ވެސް ފޮޓޯތަކަކާ އެކީ ހިއްސާކުރެއްވި އެވެ. އެގޮތުން ހިތަދޫ މޫލެކެޑަ ދާއިރާގެ ކައުންސިލަރު އަހުމަދު ސައީދުގެ އެ ޕޯސްޓްގައި ސްޓޭޑިއަމް ހަލާކުވެ ވީރާނާވެމުންދާ އިރު، އެއްވެސް އަޅާލުމެއް ނެތި އެތަން ދޫކޮށްލާފައިވާތީ ކަންބޮޑުވުން ފާޅު ކުރައްވާފައިވެ އެވެ.
އޭގެ ފަހުން މި އަހަރުގެ ފެބްރުއަރީ މަހުގެ ތެރޭގައި ސްޕޯޓްސް މިނިސްޓްރީގެ ޓީމަކާ އެކީ ސްޓޭޑިއަމް އަޕްގްރޭޑްކުރުމާ ގުޅޭ މަޝްވަރާތަކެއް ވެސް ކުރި އެވެ.