ރާއްޖެ އިން ވޯލްޑް ޓްރޭޑް އޯގަނައިޒޭޝަން (ޑަބްލިއުޓީއޯ) އާ އޮންނަ ގުޅުން އިތުރަށް ބަދަހި ކުރަން ޖެނީވާގައި މަޝްވަރާކޮށްފި އެވެ.
މި މަޝްވަރާ ކުރެވުނީ އެ ޖަމާއަތުގެ ޑިރެކްޓަ ޖެނެރަލް ޑރ. އުންގޯޒީ އޮކޮންޖޯ އިވެއެލާ އާއި ރާއްޖޭގެ ނައިބު ރައީސް ހުސައިން މުހައްމަދު ލަތީފު މިއަދު ބައްދަލުކުރައްވަ އެވެ.
ބައްދަލުވުމުގައި ނައިބު ރައީސް ވަނީ، ޑަބްލިއުޓީއޯ އިން ރާއްޖެ އަށް ފޯރުކޮށްދެމުން އަންނަ ފަންނީ އެހީތެރިކަން ޝުކުރުވެރިކަމާއެކު ފާހަގަކުރައްވައި، ރާއްޖެއިން އޮތީ އިތުރަށް އެ ގުޅުން ބަދަހިކުރުމަށާއި ގުޅިގެން މަސައްކަތްކުރުމަށް ތައްޔާރަށްކަން ފާހަގަކުރައްވައިފަ އެވެ. އަދި ރާއްޖޭގެ ދަރަނި ރީސްޓްރަކްޗަ ކުރުމުގެ މުހިންމުކަމާއި ރާއްޖެ އަށް ބޭރުގެ ސީދާ އިންވެސްޓްމަންޓްތައް އިތުރަށް ގެނައުމުގެ މުހިންމުކަން ވެސް އެމަނިކުފާނު ފާހަގަ ކުރެއްވި އެވެ.
މީގެ އިތުރުން ދެ ބޭފުޅުން ވަނީ ރާއްޖެ އާއި ޑަބްލިއުޓީއޯގުޅުން އިތުރަށް ބަދަހިކުރުމަށާއި ކުރިމަގުގައި ދެ ފަރާތުން ގުޅިގެން ކުރެވިދާނެ ކަންކަމާ ގުޅޭ ގޮތުން ވެސް މަޝްވަރާ ކުރައްވައިފަ އެވެ.
ނައިބު ސްވިޒަރލެންޑްގެ ޖެނީވާ އަށް ވަޑައިގެންނެވީ އިންސާނީ ޙައްޤުތައް ރައްކާތެރިކުރުމާ ބެހޭ ބައިނަލްއަޤްވާމީ މުއާހަދާ "ޔުނިވާށސަލް ޑިކްލަރޭޝަން އޮފް ހިއުމަން ރައިޓްސް" އަށް 75 އަހަރު ފުރުމުގެ މުނާސަބަތު ފާހަގަކުރުމަށްޓަކައި ބާއްވާ މަތީ ފަންތީގެ ހަރަކާތްތަކުގައި ބައިވެރިވެވަޑައިގަތުމަށެވެ.
ޑަބްލިއުޓީއޯގެ މެންބަރަކަށް ރާއްޖެވީ މެއި 31، 1995 ގަ އެވެ.