މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގައި ފަންނީ މީހުން ވަރަށް މަދު ކަމަށާއި އެތަނުގައި އަދާކުރަމުންދާ މަސައްކަތް ދެކެ ވަރަށް ލޯބިވާ ކަމަށް ރައީސް ޑރ. މުހައްމަދު މުއިއްޒުގެ އަނބިކަނބަލުން، ސާޖިދާ މުހައްމަދު ވިދާޅުވެއްޖެ އެވެ.
ސާޖިދާ މިހާތަނަށް ހުންނެވީ އެމްއެފްޑީއޭގެ ސީނިއާ ސައިންޓިފިކް އޮފިސަރެއްގެ ވަޒީފާގަ އެވެ. ހެލްތު މިނިސްޓްރީން ސާޖިދާގެ ފަންނީ އެހީތެރިކަން ބޭނުންވާ ކަމަށް އަންގައި، ކޮންޓްރެކްޓް އުސޫލުން އެކަމަނާގެ ކޮންސަލްޓެންސީ ލިބޭނެ ގޮތް ހަދައިދޭން ސިވިލް ސާވިސް ކޮމިޝަނުގައި އެދުމުން އެކަން އެ ކޮމިޝަނުން މިހާރު ވަނީ ހަމަޖައްސާފަ އެވެ.
ސާޖިދާ އަށް މިފަދަ ކޮންޓްރެކްޓެއް ދިނުމަށް ސީއެސްސީ އިން ނިންމުމަކީ ހާއްސަ އުސޫލަކުން އަމަލުކުރުން ކަމަށް ބައެއް ފަރާތްތަކުން ބުނާއިރު "ސަންގުޓީވީ" އަށް ދެއްވި އިންޓަވިއުއެއްގައި ސާޖިދާ ވިދާޅުވީ މިކަމުގައި ބައެއް ފަރާތްތަކުގެ ހުރި ކަންބޮޑުވުންތައް ބަލައިގަންނަ ކަމަށާއި ސީއެސްސީގައި އެދުނީ މުސާރައަކާ ނުލައި ހަމައެކަނި ޓެކްނިކަލް ދާއިރާގެ މަސައްކަތްތައް ކުރުމަށް ކަމަށެވެ. އަދި ހިންގުމުގެ ދާއިރާގެ މަސައްކަތަކާއި ނިންމުންތައް ނިންމާ މަރުހަލާގެ އެއްވެސް ކަމެއް ކުރަން ބޭނުން ނުވާ ކަމަށްވެސް ސާޖިދާ ވިދާޅުވި އެވެ.
"އަޅުގަނޑު، އަޅުގަނޑުގެ މަސައްކަތް ދެކެ ވަރަށް ލޯބިވޭ ހަގީގަތުގައި ވެސް. އެ މަސައްކަތާ ނުލާ އުޅެން ވެސް އުނދަގޫ،" ސާޖިދު ވިދާޅުވި އެވެ.
ސާޖިދާ ވިދާޅުވީ ރައީސް މުއިއްޒު ވެރިކަމަށް އިންތިހާބުވި ހިސާބުން ނިންމުންތައް ނިންމާ މަރުހަލާއާ ދުރަށް ވަޑައިގެންނެވި ކަމަށާއި ހަމައެކަނި ކުރަން ބޭނުންވާ ކަމަކީ ޓެކްނިކަލް މަސައްކަތްތައް ކަމަށެވެ.
"ފަންނީ މީހުން ވަރަށް މަދު އަޅުގަނޑުމެންގެ ތަނުގައި. މިހާރުވެސް އަޅުގަނޑާ ގުޅޭ ދާއިރާއަކުން ވެސް ކިޔަވައިގެން އައިސް ތިބޭނީ ތިން ހަތަރު ކުދިން. ވަރަށް ފަހުން ޖޮއިންކުރީ، ވަރަށް ނިއު. އަޅުގަނޑުގެ ސަޕޯޓު ވެސް އެބޭފުޅުންނަށް ބޭނުންވާނެ،" ސާޖިދާ ވިދާޅުވި އެވެ.
އެ މަސައްކަތަކީ ދުވާލަކު 24 ގަޑިއިރު ކުރާ މަސައްކަތެއް ނޫން ކަމަށާއި ދުވާލަކު ދެތިން ގަޑިއިރުން ވެސް އެކަމާ ގުޅޭ ވަރަށް ބައިވަރު މަސައްކަތް ކުރެވޭނެ ކަމަށް ސާޖިދާ ވިދާޅުވި އެވެ. އަދި އޭގެފަހުން ދުވަހުގެ ބާކީ އޮތް ވަގުތުތަކުގައި އިޖުތިމާއީ ކަންތައްތައް އޭގެ އެންމެ ފުރިހަމަ ގޮތުގައި ކުރެވޭނެ ގަބޫލުފުޅު ކުރައްވާ ކަމަށްވެސް ވިދާޅުވި އެވެ.
"ހަމަ ގައިމުވެސް އަޅުގަނޑެއް ދެ މުސާރައެއް، މިބުނީ އަނެކަތި އެއީ މުސާރައެއް ވެސް ނޫން އެލަވަންސްއެއް. އެސް އަ ފަސްޓް ލޭޑީ. އެ އެއްޗެހި އަޅުގަނޑަށް ލިބޭހާ ދުވަހަކު އަޅުގަނޑު ހަމަ ޔަގީނުން ވެސް ދައުލަތަކުން އިތުރު މުސާރައެއް ނުނަގާނަން އިރާދަކުރެއްވިޖިޔާ." ސާޖިދާ ވިދާޅުވި އެވެ.
ސިވިލް ސާވިސް ކޮމިޝަނުން ވެސް އުސޫލާ ހިލާފަށް ކަމެއް ނުކުރާނެ ކަމަށާއި ގަވާއިދާ އުސޫލުން ބޭރުން އެއްވެސް ކަމެއް ބޭނުން ނުވާ ކަމަށްވެސް ސާޖިދާ ވިދާޅުވި އެވެ. އަދި ސީއެސްސީން ވެސް އަމަލުކުރާނީ އުސޫލުތަކަށް ބެލުމަށްފަހު އެންމެ ރަނގަޅު ގޮތަށް ކަމަށް ގަބޫލުކުރާ ކަމަށްވެސް ވިދާޅުވި އެވެ.