އަހަރަކު ދެ ފަހަރު މެޑިކަލް ޗެކަޕެއް ހެދުން ރަނގަޅު ކަމެއްގެ ގޮތުގައި ދެކެވަޑައި ނުގަންނަވާ ކަމަށް އާސަންދަ ކުންފުނިން ބުނެފިއެވެ.
އަހަރަކު ދެފަހަރު މެޑިކަލް ޗެކަޕް ހެދޭ ގޮތަށް އާސަންދައިގެ ތެރޭގައި ހިމަނާފައިވަނީ މި ސަރުކާރުގެ ފުރަތަމަ ކެބިނެޓު ބައްދަލުވުމުގައެވެ. އެގޮތުން މިކަމާއި ގުޅޭގޮތުން ރައީސް ޑރ. މުހައްމަދު މުޢިއްޒު ވިދާޅުވީ މިއީ ޕްރިވެންޓިވް ހެލްތު ކެއާ ނުވަތަ ބަލި ޖެހުމުގެ ކުރިން ބަލިން ރައްކާތެރިވުމަށް އެޅޭ މުހިންމު ފިޔަވަޅެއް ކަމަށެވެ. އަދި މިކަން ކުރާނީ ޑޮކްޓަރެއްގެ ލަފާގެ މަތިން ކަމަށްވެސް ރައީސް ވަނީ ވިދާޅުވެފައެވެ.
މިއަދު ބޭއްވި އެސްއޯއީ ކޮމެޓީގެ ބައްދަލުވުމުގައި މިކަމާއި ގުޅޭގޮތުން އާސަންދަ ކުންފުނީގެ މޭނޭޖިންގް ޑިރެކްޓަރ އާމިނަތު ޒީނިޔާއާއި ވަނީ ސުވާލުކޮށްފައެވެ. މެންބަރުންގެ ސުވާލުތައް އަމާޒުވެފައިވަނީ މިކަމުގެ ނާޖާއިޒް ބޭނުން ބައެއް ފަރާތްތަކުން ހިފައި ޙަރަދު ބޮޑުވެގެން ހިނގައިދާނެ ކަމެއްގެ ގޮތުގައި ފާހަގަކޮށެވެ. މީގެ އިތުރުން އާންމު އުސޫލުން މެޑިކަލް ޗެކަޕެއް އިންޝުއަރެންސް ތެރެއިންވެސް ހަދަނީ އެއް ފަހަރުކަން މެންބަރުން ވަނީ ފާހަގަކޮށްފައެވެ.
ސުވާލުތަކަށް ޖަވާބުދެއްވަމުން ޒީނިޔާ ވަނީ އަހަރަކު ދެފަހަރު މެޑިކަލް ޗެކަޕެއް ހެދުމާއި ދެކޮޅުކަން ހާމަ ކުރައްވާފައެވެ. އަދި އެކަމުގައި އާސަންދަ ކުންފުނީގެ ވިސްނުން ހާމަކުރެއްވިއެވެ.
" އަޅުގަނޑަށްވެސް ޤަބޫލެއް ނުކުރެވޭ އަހަރަކު ދެ ފަހަރު މެޑިކަލް ޗެކަޕެއް ގޮތަށް ޗެކަޕް. ގިނަ ފަހަރަށް ޗެކަޕް ތެރޭގައި އެބައިނދޭ އެކްސްރޭ ކަހަލަ އެއްޗެހި. ބަލި މީހާ ބޮޑަށް އެކްސްޕޯޒް ކުރާކަށް ވެސް ނުޖެހޭ އެކަހަލަ އެއްޗިއްސަށް ދެން. " ޒީނިޔާ ވިދާޅުވިއެވެ.
މީގެ ކުރިންވެސް މެޑިކަލް ޗެކަޕްތައް އިންޓްރޮޑިއުސްކުރަންވެގެން ޕެކޭޖްތަކެއް ހެދި ކަމަށް ޒީނިޔާ ވިދާޅުވިއެވެ. އަދި އޭރުވެސް މަޝްވަރާ ކުރެވުނީ އަހަރަކު އެއް ފަހަރު ނޫނީ 2 އަހަރުން އެއް އަހަރު ހަދަން ކަމަށް ވިދާޅުވިއެވެ. އަދި މިހާރުވެސް މަޝްވަރާ ކުރެވެނީ އެއަށް ބަލައި ކަމަށް އޭނާ ވިދާޅުވިއެވެ.
އާސަންދަ ކުންފުނީގެ މަސައްކަތްތަކާ ގުޅޭގޮތުން، އެ ކުންފުނީގެ ބޭފުޅުންނާ ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިޒަސް ކޮމިޓީން ބައްދަލުކުރުން pic.twitter.com/T3mwA7xjVE
— People's Majlis (@mvpeoplesmajlis) December 12, 2023
މީގެ އިތުރުން މިހާރުވެސް އެކަމާއި މަޝްވަރާ ކުރެވެމުންދާއިރު ޗެކަޕަކަށް ވުރެ ބޮޑަށް ސްކްރީނިންގްއެއް ގޮތަށް އެކަން ކުރިއަށް ގެންދަން ގަސްތުކުރާ ކަން އޭނާ ފާހަގަ ކުރެއްވިއެވެ.
" މިސާލަކަށް ބޭސިކް ސްކްރީނިންގް އެކޭ ފުރަތަމަ ހަދާނީ. ރޫޓިން ބްލަޑް ހަދާފައި ޔޫރިން ހަދާލާފައި، އީސީޖީ ކަހަލަ އެއްޗެއް ނަގާލާފައި ބަލާލާފައި. އެއަށް ވޯކް ކުރަމުން އަދި މިގެންދަނީ. އަޅުގަނޑުމެންވެސް ބައިވެރިވަން އެ މަސައްކަތްތަކުގެ ތެރޭގައި " ޒީނިޔާ ވިދާޅުވިއެވެ.
އަަހަރަކު ދެފަހަރު މެޑިކަލް ޗެކަޕް ހެދޭގޮތް އިންތިޒާމު ހަމަޖެއްސުމަކީ ރައީސް، ޑރ. މުހައްމަދު މުއިއްޒު ފުރަތަމަ 100 ދުވަސް ނުވަތަ ހަފްތާ-14 ގައި ހިމެނޭ ވަޢުދެކެވެ. މިއީ ރައްޔިތުން އެކަމަކަށް އެދިފައިވާ ކަމެއްކަމަށް ސަރުކާރުން ބުނެއެވެ.