ސަތޭކަ ޑޮލަރުގެ ވަގު ނޫޓް ދައުރުވަމުންދާތީ އެކަމަށް ސަމާލުވާން މޯލްޑިވްސް މަނިޓަރީ އޮތޯރިޓީ އެމްއެމްއޭ) އިން އިލްތިމާސްކޮށްފި އެވެ.
މަރުކަޒީ ބޭންކުން މިއަދު ބުނީ މިހާރު ދައުރުވަމުންދާ 100 އެމެރިކާ ޑޮލަރުގެ ވަގު ނޫޓުތަކަކީ 1996-2016 އަހަރާ ދެމެދު ޕްރިންޓުކޮށްފައިވާ ހުދު ބޯޑަރު ހުންނަ ޑޮލަރު ނޫޓްތަކެއް ކަމަށެވެ. އަދި އެ ނޫޓުތަކުގެ ސައްޙަކަން ކަށަވަރު ކުރެވޭނެ ބައެއް ކަންކަން އެމްއެމްއޭއިން ވަނީ އާންމުކޮށްފައެވެ.
ދައުރުވަމުންދާ ވަގު ނޫޓު އައްޔަށް ދިއްކުރުމުން ނޫޓުން ފެންނަ އެމެރިކާގެ ކުރީގެ ރައީސް ބެންޖަމިން ފްރޭންކްލިންގެ ފެންމަރުކާ ޞައްޙަ ނޫޓުތަކުގެ ފެންމަރުކާއާ މުޅިން ތަފާތު ކަމަށް އެމްއެމްއޭ އިން ބުންޏެވެ. އަދި ނޫޓުގެ ވާތް ފަރާތުން ފެންނަ "USA 100" ލިޔެފައިވާ ސަލާމަތީ ރޮދިފަށް ނުފެންނަ ކަމަށާއި އަލްޓްރާ ލައިޓަށް ދިއްކުރުމުން ނޫޓުގެ ދެ ފަޅިން ދިއްލިފައި ހުންނަން ޖެހޭ ސަލާމަތީ ރޮދިފަށް އެގޮތަށް ނުފެންނަ ކަމަށް ވެސް ބުންޏެވެ.
މީގެ އިތުރުން ނޫޓުގެ މޫނުމަތީގައި ރަތް އަދި ނޫ ކުލައިން ދިއްލިފައި ހުންނަން ޖެހޭ ސެކިއުރިޓީ ފައިބާ ނުހުންނަ ކަމަށާއި، ނޫޓުގެ ކަނާތް ފަރާތުން ތިރީގައި ހިމަނާފައިވާ މޫނުމަތީ އަގު ނޫޓު އަރިކުރުމުން ކުލަ ބަދަލު ނުވާ ކަމަށް ވެސް އެމްއެމްއޭ އިން ބުންޏެވެ.
އެހެންވެ މިފަދަ ނޫޓެއް ފެނިއްޖެ ނަމަ އެ ނޫޓެއް އެމްއެމްއޭ އަށް ގެންގޮސް އޭގެ ސައްކަން ކަށަވަރުކުރަން އެދިފައިވެ އެވެ.