ރައީސް އޮފީހުގެ ތަރުޖަމާނަމަށް ތަޖުރިބާކާރު ނޫސްވެރިޔާ މުހައްމަދު ޝަހީބް އައްޔަން ކުރަން ނިންމައިފި އެވެ.
އެނގިފައިވާ ގޮތުގައި އެ މަގާމަށް މިއަދު އޭނަ އައްޔަންކުރާނެ އެވެ.
މޯލްޑިވްސް ބްރޯޑްކާސްޓިން ކޯޕަރޭޝަންގެ ރައީސްކަން ވެސް ކުރެއްވި ޝަހީބަކީ މި ވަގުތު ރާއްޖޭގައި ތިބި އެންމެ ތަޖުރިބާކާރު ނޫސްވެރިންގެ ތެރެއިން އެކެކެވެ. އެ ދާއިރާ އިން ގައުމީ އިނާމު ވެސް ހާސިލުކޮށްފައިވާ ޝަހީބު ވަނީ ކުރީގެ "ހަވީރު" ނޫހާއި "ސަން" ގައި ވެސް ގިނަ ދުވަސްތަކެއް ވަންދެން މަސައްކަތް ކުރައްވައިފަ އެވެ.
ރައީސް ޑރ. މުހްމަދު މުއިއްޒުގެ ސަރުކާރަށް ތަރުޖަމާނަކު އައްޔަން ކުރަން ތައްޔާރުވެފައި ވަނީ އެ މަގާމަށް ބޭފުޅަކު ހަމަނުޖައްސާތީ ފާޑުކިޔުންތަކެއް ވެސް އަމާޒުވެފައި ވަނިކޮށެވެ.