މަސައްކަތްތެރިކަމުގެ އެކި ހުނަރުތައް ދަރިވަރުންނަށް ދަސްކޮށް ދިނުމަށްޓަކައި އަންނަ އަހަރުން ފެށިގެން ރާއްޖޭގެ ހުރިހާ ސްކޫލެއްގައި ވެސް ހުނަރު ޕްރޮގްރާމްތައް ހިންގަން ފަށާނެ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެ އެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއެސްއާރްގެ ދަށުން ހުރަވީ ސްކޫލްގައި ގާއިމުކުރި ވޮކޭޝަނަލް ހަބް "ހުނަރުވެހި" ހުޅުއްވަން އިއްޔެ ބޭއްވި ރަސްމިއްޔާތުގައި މިނިސްޓަރު ވިދާޅުވީ ހުނަރުވެރި ދިވެހިވަންތަ ޖީލެއް ބިނާކުރުމަަކީ ރައީސް ޑރ. މުޙައްމަދު މުޢިއްޒުގެ ވަރަށް ބޮޑު އަމާޒެއް ކަމަށެވެ.
އެހެންވެ ރާއްޖޭގެ ކޮންމެ ސްކޫލެއްގައި ވެސް އަންނަ ދިރާސީ އަހަރާ އެކީ ހުނަރު ދަސްކޮށްދިނުމުގެ ޕްރޮގްރާމްތައް ފައްޓަވާނެކަމަށް ވިދާޅުވި އެވެ. މިނިސްޓަރު ވިދާޅުވި ގޮތުގައި މި ކަމަކީ ހަމައެކަނި ކިޔެވުމަށް ދަށް ކުދިންނަށް ދޭ ފުރުޞަތެއްގެ ބަދަލުގައި، ކޮންމެ ދަރިވަރަކަށް ވެސް އެކަމުގައި ބައިވެރިވުމުގެ ފުރުޞަތު ހަމަހަމަކަމާއެކު އޮންނާނެ ކަމަށެވެ.
އެގޮތުން ސްކޫލް ނިންމާ ކޮންމެ ދަރިވަރަކީ ވެސް ކޮންމެވެސް ހުނަރެއް އެނގޭ ކުދިންނަށް ހެދުމަކީ ތައުލީމީ ނިޒާމުގެ މުހިއްމު ސިޔާސަތެއް ކަމަށް ވިދާޅުވި އެވެ.
"އަންނަ އަހަރު ސްކޫލްތަކުގެ ނިޒާމަށް ހުނަރު ދަސްކޮށްދިނުމުގެ ޕްރޮގްރާމްތައް ތަޢާރަފު ކުރާނަން. އެކަން މަތީ ތަޢުލީމުގެ ވުޒާރާއާއެކު، ފަރުމާކުރުމުގެ މަސައްކަތް ދަނީ ކުރިއަށް،" މިނިސްޓަރު ވިދާޅުވި އެވެ. "މި ފުރުސަތު ސްކޫލްގައި ކިޔަވާ އެންމެ ދަށް ކުއްޖާ އަށް ވެސް އަދި އެންމެ މޮޅު ކުއްޖާ އަށް ވެސް ހުނަރު ދަސްކުރުމުގެ ފުރުސަތު ލިބޭނެ."
ރާއްޖޭގެ އެކި ސްކޫލްތަކުގައި މި ފަހުން އަންނަނީ އެކިއެކި ހުނަރުތައް ދަސްކޮށްދޭ ލެބްތައް ހުޅުވައި، ދަރިވަރުންނަށް އަމަލީ ގޮތުން މަސައްކަތްތައް ދަސްކޮށް ދެމުންނެވެ.