އައްޑޫ އަންހެނުންނަށް ކަސަބު ވިޔަން ދަސްކޮށްދޭ އިތުރު ކޯހެއް ހިންގަން ނިންމައިފި އެވެ.
އަންހެނުންގެ ތަރައްގީ އަށް މަސައްކަތްކުރާ ކޮމިޓިން ހިންގަން ހަމަޖެހިފައިވާ މި ކޯހުގައި ބައިވެރިވާން ޝައުގުވެރިވާ މީހުންނަށް މިއަދުން ފެށިގެން މި މަހުގެ 20 އާ ހަމައަށް ވަނީ ނަން ނޯޓްކުރުމުގެ ފުރުސަތު ހުޅުވާލައިފަ އެވެ. ނަން ނޯޓްކުރުމަށާއި އިތުރު މައުލޫމާތު ހޯދަން ގުޅަން ޖެހެނީ މި 9336787 ނަމްބަރަށެވެ.
އަންހެނުންގެ ތަރައްގީ އަށް މަސަައްކަތްކުރާ ކޮމިޓީން ބުނީ މަސް ދުވަހުގެ މުއްދަތަށް ހިންގަން ހަމަޖެހިފައިވާ ކަސަބު ކޯހުން ފުރުސަތު ދޭން ނިންމާފައި ވަނީ 15 މީހަކަށް ކަމަށާއި ބައިވެރިވާން 500ރ. ގެ ފީއެއް ދައްކަން ޖެހޭނެ ކަމަށެވެ.
މިދިޔަ އަހަރު ވެސް އައްޑޫގައި ކަސަބު ވިޔަން ދަސްކޮށްދޭ ކޯހެއް ހިންގާފައިވެ އެވެ.
ދާދި ފަހުން އަންހެނުންގެ ކޮމިޓީން ވަނީ އަންހެނުންނަށް ގެވެހި ކަރަންޓް ސާމާނު މަރާމާތުކުރަން ދަސްކޮށްދޭ ކޯހެއް ވެސް ހިންގައިފަ އެވެ. އެ ކޯސް ހިންގީ ފެނަކަ އިންސްޓިޓިއުޓާ ގުޅިގެންނެވެ.