ފަސްޓްލޭޑީ ސާޖިދާ މުހައްމަދު އަދާކުރައްވަމުން ގެންދެވި ސިވިލް ވަޒީފާގައި ދެމިހުންނެވުމަށް ހެލްތު މިނިސްޓްރީއާ އެކު ހެދި އެއްބަސްވުން ބާތިލުކުރުމަށް ގޮވާލައި ރައްޔިތުންގެ މަޖިލީހަށް މިއަދު ކުއްލި މައްސަލައެއް ހުށަހަޅައިފި އެވެ.
އެ މައްސަލަ ހުށަހެޅުއްވީ ދާންދޫ ދާއިރާގެ އެމްޑީޕީ މެމްބަރު ޔައުގޫބު އަބްދުﷲ އެވެ. އެ މައްސަލާގައި ވިދާޅުވެފައި ވަނީ ގާނޫނާ ހިލާފަށް ހާއްސަ އުސޫލަކުން ސާޖިދާ އަށް ކޮންޓްރެކްޓެއް ދީފައިވަނީ ސިވިލް ސާވިސްގައި މަސައްކަތްކުރާ އެތަކެއް ހާސް މުވައްޒަފުންގެ ހައްގުތައް ގެއްލޭ ގޮތަށް ކަމަށެވެ. އެހެންވެ ކޮންޓްރެކްޓު ބާތިލުކުރުމަށް އެ ކުއްލި މައްސަލާގައި ގޮވާލާފައިވެ އެވެ.
މައްސަލަ މަޖިލީހަށް ބަލައިގަނެ ބަހުސް ފަށާފައި ވަނީ، އެ ކަމަށް ނެގުނު ވޯޓުގައި ބައިވެރިވެވަޑައިގެންނެވި 21 މެމްބަރުންގެ އަޣުލަބިއްޔަތުންނެވެ. މައްސަލަ ބަލައިނުގަންނަން ވޯޓް ދެއްވީ ހަތަރު މެމްބަރެކެވެ.
ރައީސް ޑރ. މުހައްމަދު މުއިއްޒުގެ އަނބިކަނބަލުންނަކީ ހެލްތު މިނިސްޓްރީގެ ދަށުން ހިންގާ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ ސީނިއާ ސައިންޓިފިކް އޮފިސަރެވެ. ހެލްތު މިނިސްޓްރީން ސާޖިދާގެ ފަންނީ އެހީތެރިކަން ބޭނުންވާ ކަމަށް އަންގައި، ކޮންޓްރެކްޓް އުސޫލުން ސާޖިދާގެ ކޮންސަލްޓެންސީ ލިބޭނެ ގޮތް ހަދައިދޭން ސިވިލް ސާވިސް ކޮމިޝަން (ސީއެސްސީ) ގައި އެދުމުން އެކަން ހަމަޖައްސާފައިވެ އެވެ.
ހަމަޖައްސައިދިން އުސޫލާ ބެހޭ ގޮތުން ސާޖިދާ ވިދާޅުވީ އެމުގައި ބައެއް ފަރާތްތަކުގެ ހުރި ކަންބޮޑުވުންތައް ބަލައިގަންނަ ކަމަށާއި ސީއެސްސީގައި އެދުނީ މުސާރައަކާ ނުލައި ހަމައެކަނި ޓެކްނިކަލް ދާއިރާގެ މަސައްކަތްތައް ކުރުމަށް ކަމަށެވެ. އަދި ހިންގުމުގެ ދާއިރާގެ މަސައްކަތަކާއި ނިންމުންތައް ނިންމާ މަރުހަލާގެ އެއްވެސް ކަމެއް ކުރަން ބޭނުން ނުވާ ކަމަށް ވެސް ވިދާޅުވި އެވެ.
"އަޅުގަނޑު، އަޅުގަނޑުގެ މަސައްކަތް ދެކެ ވަރަށް ލޯބިވޭ ހަގީގަތުގައި ވެސް. އެ މަސައްކަތާ ނުލާ އުޅެން ވެސް އުނދަގޫ." ސާޖިދު ވިދާޅުވި އެވެ.
އެކަމަނާ ވިދާޅުވެފައި ވަނީ ފިރިކަލުން ވެރިކަމަށް އިންތިހާބުވި ހިސާބުން ނިންމުންތައް ނިންމާ މަރުހަލާއާ ދުރަށް ވަޑައިގެންނެވި ކަމަށާއި ހަމައެކަނި ކުރަން ބޭނުންވާ ކަމަކީ ޓެކްނިކަލް މަސައްކަތްތައް ކަމަށެވެ.
"ފަންނީ މީހުން ވަރަށް މަދު އަޅުގަނޑުމެންގެ ތަނުގައި. މިހާރުވެސް އަޅުގަނޑާ ގުޅޭ ދާއިރާއަކުން ވެސް ކިޔަވައިގެން އައިސް ތިބޭނީ ތިން ހަތަރު ކުދިން،" ސާޖިދާ ވިދާޅުވި އެވެ. "ވަރަށް ފަހުން ޖޮއިންކުރީ، ވަރަށް ނިއު. އަޅުގަނޑުގެ ސަޕޯޓު ވެސް އެބޭފުޅުންނަށް ބޭނުންވާނެ،" ސާޖިދާ ވިދާޅުވި އެވެ.
އެ މަސައްކަތަކީ ދުވާލަކު 24 ގަޑިއިރު ކުރާ މަސައްކަތެއް ނޫން ކަމަށާއި ދުވާލަކު ދެތިން ގަޑިއިރުން ވެސް އެކަމާ ގުޅޭ ވަރަށް ބައިވަރު މަސައްކަތް ކުރެވޭނެ ކަމަށް ސާޖިދާ ވިދާޅުވި އެވެ. އަދި އޭގެ ފަހުން ދުވަހުގެ ބާކީ އޮތް ވަގުތުތަކުގައި އިޖުތިމާއީ ކަންތައްތައް އޭގެ އެންމެ ފުރިހަމަ ގޮތުގައި ކުރެވޭނެ ގަބޫލުފުޅު ކުރައްވާ ކަމަށް ވެސް ވިދާޅުވި އެވެ.
"ހަމަ ގައިމުވެސް އަޅުގަނޑެއް ދެ މުސާރައެއް، މިބުނީ އަނެކަތި އެއީ މުސާރައެއް ވެސް ނޫން އެލަވަންސެއް. އޭސް އަ ފަސްޓް ލޭޑީ،" ސާޖިދާ ވިދާޅުވި އެވެ. "އެ އެއްޗެހި އަޅުގަނޑަށް ލިބޭހާ ދުވަހަކު އަޅުގަނޑު ހަމަ ޔަގީނުން ވެސް ދައުލަތަކުން އިތުރު މުސާރައެއް ނުނަގާނަން އިރާދަކުރެއްވިއްޔާ."