އުރަމަތީގެ ކެންސަރާ ހަނގުރާމަ ކުރުން އަންނަ މީހެއްހެ ފަރުވާ އެންސްޕާ އިން އެހީތެރިކަން ފޯރުކޮށް ދޭނެކަމުގެ ޔަގީންކަން އެތަނުގެ ސީއީއޯ ހީނާ ވަލީދު ދެއްވައިފި އެވެ.
އޭނަ އެކަން ހިއްސާކުރެއްވީ އައްޑޫ ފޭދު އަށް އުފަން ފާތުމަތު ޝާމިލާގެ ހާލަތު ބަޔާންކޮށް، ސޯޝަލް މީޑިއާގައި އާންމުކޮށްފައިވާ ޕޯސްޓަކާ އެކީގަ އެވެ. އޭގައި ހީނާ ވިދާޅުވީ އިއްޔެ ޝާމިލާ އަށް ފޯނުން ގުޅުއްވައި ޙާލު އޮޅުން ފިލުއްވި ކަމަށެވެ.
"ފަރުވާގެ ކަންކަން ކުރިއަށް ގެންދަން ޝާމިލާ ބޭނުންވާ ގޮތް އޮޅުން ފިލުވިން. އަދި އެގޮތަށް ފަރުވާ ކުރިއަށް ގެންދިއުމުގައި އަޅުގަނޑުމެންނަށް ދެވެން ހުރި ހުރިހާ އެހީތެރިކަމެއް ފޯރުކޮށްދޭނެ ކަމުގެ ޔަގީންކަން ދިނިން." ހީނާ ވިދާޅުވި އެވެ.
އޭނަ ވިދާޅުވީ މި ސަރުކާރުގެ އަމާޒަކީ އެއްވެސް މީހަކު ހަވާސާ ނުކޮށް ނިޒާމްގެ ތެރެއިން އަޅާލުމާ އޯގާތެރިކަމާއި ލޯތްބާއެކު އެހީތެރިކަން ފޯރުކޮށް ދިނުން ކަމަށެވެ.
"ކޮންމެ ބޭފުޅެއްގެ ވެސް އަޑުއަހާނަން. އަދި އެ ބޭފުޅަކަށް ކޮށްދެވެން ހުރި ކަންކަން ކޮށްދިނުމަށް އިސްކަންދީ އެއްބާރުލުން ދޭނަން،" ހީނާ ވިދާޅުވި އެވެ. "ޝާމިލާ އަށް އަވަސް ޝިފާއެއް މިންވަރު ކުރައްވާށި."
ޝާމިލާ އަކީ މި އަހަރުގެ ޖެނުއަރީގައި އުރަމަތީގެ ކެންސަރު ޖެހި އެ ބައްޔަށް ފަރުވާ ހޯދަމުން އަންނަ މީހެކެވެ. އެގޮތުން ރާއްޖެ އިން ބޭރުން ފަރުވާ ހޯދަން އާންމުންގެ އެހީ އަށް އޭނަ އެދިފައިވެ އެވެ.
ޝާމިލާ ކިޔައި ދީފައިވާ ގޮތުގަ އޭނަ އަށް އުރަމަތީގެ ކެންސަރު ޖެހުނުކަމް އެނގުނީ މި އަހަރު ޖެނުއަރީ 25 ވަނަ ދުވަހުގެ މޭމައްޗަށް ކުއްލިއަކަށް އެރި ތަދަކާ ގުޅިގެން ޑޮކްޓަރަކަށް ދައްކައި ހެދި ޓެސްޓްތަކުންނެވެ. އެއާ އެކީ އިމަޖެންސީކޮށް ފަރުވާ ފަށަން ޖެހޭކަމަށާއި އޭނަ ހުރީ ބަލީގެ ސްޓޭޖް ދޭއްގައި ކަމަށް ވެސް ބުންޏެވެ.
އެގޮތުން ފެބުރުއަރީ މަހުގެ 1 ގައި ސާޖަރީއެއް ހަދާފައިވާ ކަމަށް ޝާމިލާ ބުންޏެވެ. އެ ސާޖަރީ އަށް ފަހު މާޗް 11 އިން ފެށިގެން ކީމޯތެރަޕީ ފަރުވާ ވެސް ހޯދަން ފަށާފައިވެ އެވެ. އެގޮތުން ޖުމްލަ 8 ކީމޯތެރަޕީ އާއި އެކު 15 ރޭޑިއޭޝަން ދޭން ޖެހޭ ކަމަށް ޑޮކްޓަރ ބުނެފައިވެއެވެ. ޑޮކްޓަރ ބުނެފައި ވަނީ، މި ކެންސަރު ހުރި މިންވަރަށް ބަލާ އިރު ދޭން ޖެހެނީ އެންމެ ހައި ޑޯޒްގެ ކީމޯތެރަޕީ ކަމަށެވެ.
އެގޮތުން ފަރުވާ ކުރިއަށް ގެންދަް އާސަންދައަށް ހުށަހަޅެމުން އެ ބައްޔަށް ބޭސް ކުރަން އެޑްމިޓް ކުރުމުން ބޭސްފަރުވާގެ ކަންކަން އާސަންދައިގެ ދަށުން ކުރެވޭނެ ކަމަށް ބުނެފައިވާ ކަމަށް ޝާމިލާ ބުންޏެވެ. ނަމަވެސް ފަރުވާ ހޯދަން ސްރީ ލަންކާގައި ކުރަން ޖެހުނު ހިތި ތަޖުރިބާގެ ސަބަބުން، ފަރުވާ ދެން ކުރިއަށް ގެންދަން ބޭނުން ވަނީ އިންޑިއާގައި ކަމަށް ބުންޏެވެ.
ނަމަވެސް މާލީ ހާލަތު ހުރި ގޮތުން ގިނަ ދުވަހު މަޑުކޮށްގެން ފަރުވާ ހޯދަން އިންޑިއާގައި ހުންނަން ޖެހުމުން އެކަމަށް ދީލަތި އެހީ ބޭނުންވާ ކަމަށް ޝާމިލާ ބުންޏެވެ. އެހެންވެ ވީހާ ވެސް ގިނަ ބަޔަކު އެހީތެރިކަމް ފޯރުކޮށް ދޭން އެދިފައިވެ އެވެ. ޝާމިލާގެ އެކައުންޓް ނަމްބަރަކީ 7701149818101 މި އެވެ. އެކައުންޓް ނަމަކީ ފާޠިމަތު ޝާމިލާ ޝާކިރު އެވެ. ފޯނު ނަމްބަރަކީ 9193711 އެވެ.
އެންސްޕާގެ ސީއީއޯ އަށް ހީނާ ޝާމިލާގެ ހާލަތު ބައްލަވައި އެހީތެރިކަން ދެއްވަން ނިންމެވުމަކީ މި ވަގުތަށް ލިބުނު ވަރަށް ބޮޑު ހިތްހަމަޖެހުމެކެވެ.