ރާއްޖެ އާއި އިންޑިއާއާ ދެމެދު އެއްބަސްވެފައިވާ ރާއްޖޭގެ ހައިޑްރްގްރަފީ ސާވޭ ހެދުމުގެ އެއްބަސްވުން އާ ނުކުރާނެކަން އިންޑިއާ ސަރުކާރަށް މިހާރު އަންގާފައިވާ ކަމަށް ސަރުކާރުން ހާމަކޮށްފިއެވެ.
ސަރުކާރުގެ މަސައްކަތްތަކާއި ގުޅޭގޮތުން މައުލޫމާތު ހާމަކުރުމަށް ބާއްވަމުންދާ ނޫސްވެރިންގެ ބައްދަލުވުމުގައި، ރައީސް އޮފީހުގެ ޕަބްލިކް ޕޮލިސީގެ އަންޑަ ސެކްރެޓަރީ މުހައްމަދު ފިރުޒުލް ވަނީ ބޭރު ޤައުމަކާއި އެކު ހަދާފައި ހުރި ޤައުމީ ސަލާމަތަށް ނުރައްކާވާ އެއްބަސްވުން އުވާލުމުގެ ވައުދުގެ ތެރެއިން ނިންމާފައި ނިންމުމެއް ކަމަށެވެ.
މިއެއްބަސްވުމުގެ މުއްދަތު ހަމަވަނީ އަންނަ އަހަރު ޖޫން މަހުގެ 7 ވަނަ ދުވަހު ކަމަށް ވިދާޅުވެ، އެއްބަސްވުން އައު ކުރާނަމަ އޭގެ 6 މަސް ދުވަސް ކުރިން އަންގަން ޖެހޭ ކަމަށް އޭނާ ވިދާޅުވިއެވެ. ފިރުޒުލް ވިދާޅުވީ މި ނިންމުމަކީ ކެބިނެޓުގައި އެކަން މަޝްވަރާ ކުރެވި ނިންމި ނިންމިމުމެއް ކަމަށެވެ.
"… އަޅުގަނޑުމެންގެ ކަނޑުފަޅުތަކުގެ މައުލޫމާތަކީ ޒަމާނުއްސުރެ އަޅުގަނޑުމެން ކާބަފައިން، ޒަމާނުއްސުރެން އަޅުގަނޑުމެންގެ ރައުސުލްމާލެއް ގޮތުގައި، އަޅުގަނޑުމެންގެ ސިއްރެއްގެ ގޮތުގައި، ދެކި އެގޮތަށް ޤަބޫލުކޮށް އެފަދައިން އަމަލު ކުރަމުން އައި ހާއްސަ މައުލޫމާތުތަކެއް. " ފިރުޒުލް ވިދާޅުވިއެވެ.
ފިރުޒުލް ވިދާޅުވީ އޭގެ ބަދަލުގައި ރައީސްގެ ވިސްނުންފުޅަކީ މި މައުލޫމާތަކީ އެމްއެންޑީއެފްގެ އެތެރޭގައި އިތުރު އެއްވެސް ފަރާތެއްގެ އެހީއާއި ނުލާ ރައްކާކުރެވިފައި ހުންނަން ޖެހޭ މައުލޫމާތު ކަމުން އެކަން ކުރުމަށް ބޭނުންވާ ޤާބިލުކަން އިތުރު ކުރަން ޖެހޭ ކަމަށެވެ.
" މި ވިސްނުންފުޅުގައި މި ނިންމުން ނިންމުމާއި އެކުއެކީގައި އެމަނިކުފާނު ވަނީ އެމްއެންޑީއެފްގައި މި ޤާބިލްކަން އިތުރުކުކޮށް ޤާއިމް ކުރުމަށްޓަކައި، ބަޖެޓުގެ ތެރެއިން ހާއްސަ މިންވަރެއް ކަނޑައަޅުއްވައި، ފިނޭންސުން އެ ބަޖެޓު ހަމަޖައްސަވާ އެ ޤާބިލްކަން ޤާއިމް ކުރުމުގެ މަސައްކަތް އެމްއެންޑީއެފް ތެރޭގައި ފެށިގެން ކުރިއަށް އެބަދޭ " ފިރުޒުލް ވިދާޅުވިއެވެ.
މި އެއްބަސްވުމާއި ގުޅިގެން 2021 ނޮވެމްބަރު މަހު އޭރުގެ ސަރުކާރުން މަޖިލީހުގެ 241 ކޮމެޓީއަށް މައުލޫމާތު ދެމުން ވިދާޅުވީ، މިއީ 2015 ވަނަ އަހަރު އޭރުގެ ސަރުކާރުން މިފަދަ ސާވޭއެއް ކުރުމަށް އެދިގެން 2016 ވަނަ އަހަރު ސޮއިކުރެވުނު ޑިފެންސް އެކްޝަން ޕްލޭންގައި ހިމެނިފައިވާ ކަމެއް ކަމަށެވެ.
އޭރުވެސް ސާވޭއާއި ގުޅިގެން އެންމެ ބޮޑު އެއް ކަންބޮޑުވުމަކަށް އޮތީ، ސާވޭގެ ތެރެއިން ތައްޔާރު ކުރެވޭ ޗާޓުތައް ދިވެހި ރާއްޖެއަށް ކުޑައެއްޗެއް ދީފައިވާ އިންޑިއާއަށް އެހެން ފަރާތްތަކަށް ވިއްކުމުގެ ހުއްދަ އޮތުމެވެ. އެކަންބޮޑުވުން ތަކަށް އޭރުގެ ސަރުކާރުން ސީދާ ޖަވާބެއް ނުދީ ބުނެފައިވަނީ، ރާއްޖެއިން ސާވޭ ކުރަން ބޭނުންވާ ސަރަހައްދުތައް ލިމިޓް ކުރެވެން އޮތް ކަމަށެވެ.