ސިފައިންނާއި ފުލުހުންގެ ފްލެޓުތަކުގެ ކުލި އެއް އަހަރު ދުވަހަށް ފަސް ކުރަށް ސަރުކާރުން ނިންމައިފިއެވެ.
ސަރުކާރުގެ ހަފްތާ-14 ޕްލޭންގެ ތެރެއިން ފުރަތަމަ 4 ހަފްތާގެ ތެރޭގައި ހާސިލް ކުރަން ބޭނުންވާ ކަންކަމުގެ ތަފްސީލު ހާމަކުރަން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، އެއޮފީހުގެ ޕަބްލިކް ޕޮލިސީގެ އަންޑަ ސެކްރެޓަރީ މުހައްމަދު ފިރުޒުލް ސަރުކާރުން މިކަން ކުރުމަށް ނިންމަވާފައިވާކަން ހާމަކޮށްފައެވެ. މިގޮތުން ސިފައިންނާއި ފުލުހުން ފްލެޓުތަކުގެ ކުލި ފަސް ކުރަނީ އިންޓްރެސް ނުހިނގާ ގޮތަށެވެ.
"މި ދެމަޝްރޫޢުއަށް ދޫކޮށްފައިވާ ޓްރެޝަރީ ލޯން އަނބުރާ ދެއްކުން އެއް އަހަރުގެ ގްރޭސް ޕީރިއޭޑަކަށް ނުހިނގާ ގޮތަށް، ފަސްކޮށް ރީސްޓްރަކްޗަރ ކުރުމަށް ރައިސުލްޖުމުހޫރިއްޔާ ވަނީ ނިންމަވާ އެކަން މާލީ ވުޒާރާއަށް އަންގަވާފައި. އެހެން ކަމުން މިވައުދުވެސް މިވަނީ ހާސިލް ކުރެވިފައި " ފިރުޒުލް ވިދާޅުވިއެވެ.
ސިފައިންނާއި ފުލުހުންނަށް ބޯހިޔަވަހިކަން ފޯރުކޮށްދިނުމުގެ މަޤްޞަދުގައި މި ދެ މަޝްރޫޢު ފެށިގެން ކުރިއަށްދާތާ އަހަރުތަކެއް މިވަނީ ވެފައެވެ. ނަމަވެސް މީގެއިން އެއްވެސް މަޝްރޫޢެއް މިހާތަނަށް ނުނިމިވާއިރު، ސިފައިން ފްލެޓުތަކަށް އާއިލާތަކުން ވަދެ މިހާރު ދިރިއުޅެން ވަނީ ފަށާފައެވެ. މީގެ ތެރެއިން ފުލުހުންގެ ފްލެޓުތަކުގެ މަސައްކަތްތައް ނިމޭނެ ދުވަހެއް ނޭނގެއެވެ.
ސިފައިންނާއި ފުލުހުންނަށް ހުޅުމާލޭ ގައި ފްލެޓްތަކެއް އިމާރާތް ކުރަން ފެށީ 2013 ވަނަ އަހަރު، ރައީސް ޑރ. މުހައްމަދު ވަހީދުގެ ވެރިކަމުގައެވެ.