ސަރިކާރާ ހަވާލުވެވަޑައިގަތް ފަހުން ރައީސް ޑރ. މުހައްމަދު މުއިއްޒު އެންމެ ފުރަތަމަ ރާއްޖެ އިން ބޭރަށް ކުރެއްވި ރަސްމީ ދެ ދަތުރަށް ތިން މިލިއަނަށް ވުރެ ގިނަ ރުފިޔޭ ހޭދަވި ކަމަށް ރައީސް އޮފީހުން ބުނެފި އެވެ.
ރައީީސް އޮފީހުން ބުނީ މިދިޔަ މަހުގެ ތެރޭގައި ތުރުކީ އާއި ދުބާއީ އަށް ކުރެއްވި ދަތުރަށް ހަރަދުވީ ޖުމްލަ 3،489،165ރ. ކަމަށެވެ. އެގޮތުން ދެ ދަތުރުގެ ޓިކެޓްތަކަށް ހޭދަވީ ޖުމްލަ 2،454،555ރ. އެވެ. އޭގެ ތެރޭގައި ފަސްޓް ކްލާސް ހަތަރު ޓިކެޓާއި ބިޒްނަސް ކްލާސްގެ 12 ޓިކެޓުގެ އިތުރުން އިކޮނޮމީ ކްލާސްގެ 12 ޓިކެޓު ހިމެނެ އެވެ.
ރައީީސްގެ ތުރުކީ ދަތުރުފުޅަށް ވަނީ 259،376ރ. ރުފިޔާ ހަރަދު ވެފަ އެވެ. ނަމަވެސް އެ ދަތުރުފުޅުގެ އެކޮމޮޑޭޝަނާއި ފަރިއްކޮޅުގެ ހަރަދުގެ އިތުރުން ދަތުރުފަތުރުގެ ހަރަދު ހަމަޖައްސައި ދިނީ ތުރުކީގެ ސަރުކާރުން ކަމަށް ރައީސް އޮފީހުން ބުންޏެވެ.
ދެ ދަތުރުފުޅުގެ ތެރެއިން އެންމެ ބޮޑު ހަރަދެއް ހޭދަވީ ކޮޕް-28 ގައި ބައިވެރިވެވަޑައުގަތުމަށް ކުރެއްވި ދުބާއީ ދަތުރަށެވެ. އެ ދަތުރަށް 775،232ރ. ހޭދަވި އެވެެ. އެ ދަތުރުގައި 10 ބޭފުޅެއްގެ އެކޮމެޑޭޝަނާއި ފަރިއްކޮޅު ހަރަދު ހަމަޖެއްސެވީ އެ ގައުމުގެ ސަރުކާރުން ކަމަށް ވެސް ރަައީސް އޮފީހުން ބުންޏެވެ.
ދަތުރުތަކުގެ ހަރަދު ކުޑަ ކުރުމުގެ ގޮތުން ފަސްޓް ކުލާހުގައި ދަތުރު ނުކުރެއްވުމާއި ދަތުރުތަކުގައި ބައިވެރިވާ މީހުންގެ އަދަދު މަދުކުރުމަކީ ވަރަށް ބޮޑު އިސްކަމެއް ދެއްވާނެ ކަމެއް ކަމަށް ރައީސް ވިދާޅުވެފައިވެ އެވެ.