ރާއްޖެއިން ނައްތާލާފައިވާ ފައިލޭރިއާގެ ކޭސްތަކެއް ހދ. ކުޅުދުއްފުށިން ފެނިއްޖެ އެވެ.
ކުޅުދުއްފުށީ ހޮސްޕިޓަލުން ބުނީ މި ކޭސްތައް ފެނިފައިވަނީ ދުނިޔޭގެ އެއިޑްސް ދުވަސް ފާހަގަކުރުމުގެ ގޮތުން ބިދޭސީންނަށް އަމާޒުކޮށްގެން މިމަހުގެ 1 އިން 2 އަށް ކުރިއަށް ގެންދިޔަ ހެލްތު ކޭމްޕޭޭނެއްގެ ތެރެއިން ކަމަށެވެ. އެ ކޭމްޕަށް ޒިޔާރަތްކުރި ފަރާތްތަކުގެ ސިއްހީ ހާލަތު ދެނެގަތުމަށްޓަކާ ބައެއް ކަހަލަ ބަލިތަކަށް ސްކްރީން ކުރެވުނު ކަމަށް ކުޅުދުއްފުށި ހޮސްޕިޓަލުން ބުނެ އެވެ.
"މިގޮތުން، ކުރެވުނު ސްކްރީން ޓެސްޓުތަކުގެ ތެރެއިން ބައެއް ފަރާތްތައް ވަނީ ފައިލޭރިއާ އަށް ޕޮޒިޓިވް ވެފައި،" ކުޅުދުއްފުށި ހޮސްޕިޓަލުން ބުނެ އެވެ.
ފައިލޭރިއާއަށް ޕޮޒިޓިވްވި މީހުންނާ އެކު ދިރިއުޅޭ މީހުންގެ ސްކްރީނިން ޓެސްޓުތައް ހެދުމުގެ މަސައްކަތް މިހާރު ކުރަމުންދާ ކަމަށް ހޮސްޕިޓަލުން ބުނެ އެވެ. އަދި ސްކްރީނިން ޓެސްޓުން ޕޮޒިޓިވް ކަމަށް ދައްކާ ފަރާތްތަކުގެ ބަލި ހުރިކަން ޔަގީންކުރުމަށްޓަކާ އިތުރު ކޮންފަމޭޓަރީ ޓެސްޓުތައް ހަދާނެ ކަމަށްވެސް ހޮސްޕިޓަލުން ބުނެ އެވެ.
ކުޅުދުއްފުށީ ހޮސްޕިޓަލުން ބުނީ ފައިލޭރިއާ އަށް ޕޮޒިޓިވް ވެފައިވާ ފަރާތްތަކަކީ އަދިވެސް ފައިލޭރިއާ ބަލި އުޅޭ ގައުމުތަކުންނާއި ސަރަހައްދުތަކުން ވަރަށް ފަހުން ރާއްޖެ އައިސްފައިވާ ފަރާތްތަކެއް ކަމަށެވެ.
ފައިލޭރިއާއަކީ ރާއްޖެއިން ނައްތާލެވިފައިވާ ބައްޔެކެވެ. ފައިލޭރިއާއަށް ދެވޭ ފަރުވާއަކީ އެއްފަހަރު ބޭނުންކުރާ ދެ ބެހޭކެވެ. މިއީ ހަޑި ފެނުގައި އުފެދޭ ކިއުލެކްސް މަދިރީގެ ޒަރިއްޔާ އިން ފެތުރޭ ބައްޔެކެވެ.