ވަކި ބްރޭންޑެއްގެ ބޭހެއް ޑރ. ލިޔެފައި އެ ބްރޭންޑް ނޫން އެހެން ބްރޭންޑެއް ނުދިނުމަށް ބޭސް ސިޓީގައި ލިޔެފި ނަމަ އެހެން ބްރޭންޑެއް ނުދެވޭ ގޮތަށް ހަދަން އާސަންދަ ކުންފުނިން ނިންމައިފިއެވެ.
އާސަންދަ ކުންފުނިން މިއަދު ބޭސް ފިހާރަތަކަށް ފޮނުވާފައިވާ ސާކިއުލާގއި ބުނެފައިވަނީ، އާސަންދަ ސްކީމުގެ ތެރެއިން ޑޮކްޓަރު ބޭސް ލިޔެދެއްވާއިރު، ވަކި ބްރޭންޑެއްގެ ބޭސް ދޫކުރުމަށް ބޭނުންވާނަމަ ބޭހުގެ އިރުޝާދުގައި އެ ބޭހުގެ ބަދަލު ބޭހެއް ނުދިނުމަށް ލިޔަން ވާނެ ކަމަށެވެ.
މިހެން ލިޔެފައި އޮންނަ ހާލަތެއްގައި ބޭސް ފިހާރައިން ދޫކުރަންވަނީ ސީދާ އެ ބްރޭންޑު ކަމަށް އާސަންދައިން ބުނެއެވެ. އަދި އެ ހަލާތުގައި ބޭސް ފިހަރާގައި އެ ބްރޭންޑް ނެތް ނަމަ އެކަން ބަލި މީހާއަށް އޮޅުން ފިލުވައިދޭން ވާނެ ކަމަށް އާސަންދައިން ބުނެއެވެ. މީގެ އިތުރަށް އެހެން ބޭސް ފިހާރަތަކުންވެސް އެ ބޭސް ނުލިބޭ ހާލަތުގައި ބަލިމީހާ އަލުން ޑޮކްޓަރު ލައްވާ ބޭސް ލިއުއްވަން ޖެހޭނެ ކަމަށް އާސަންދައިން ބުނެއެވެ.
މި ގޮތަށް އިރުޝާދުގައި ވަކި ބޭހެއްގެ ނަން ބޭސް ސިޓީތަކަށް އާސަންދައަށް އެންޓަރ ކުރަން ވަނީ ފިހާރައިން ދޫކުރާ ބްރޭންޑް ކަމަށް އާސަންދައިން ބުނެއެވެ. އަދި އެގޮތަށް ލިޔެފައިވާ ހާލަތުގައި އެހެން ބްރޭންޑެއް ދޫކޮށް ބިލް ކޮށްފިނަމަ މިމަހުގެ 17 ގައި ފަހުން ރިޖެކްޓް ކުރެވޭނެ ކަމަށް އާސަންދަ ކުންފުނިން ވަނީ ބުނެފައެވެ.
އާސަންދައިން ބޭސް ދޫކުރާ އުސޫލުތައް ހަރުދަނާ ކުރުމުގެ ދަށުން، މީގެ ކުރިންވެސް ބައެއް ބަދަލުތައް ވަނީ ގެނެސްފައެވެ. އެގޮތުން މިހާރު ފާމަސީތަކުން ބޭސް ދޫކުރެވެނީ ކަސްޓަމަރު ފޯނަށް ފޮނުވާ އޯޓީޕީ ކޯޑު ދިނުމުންނެވެ. މިއީ ބަލިމީހާއަށް ނޭނގި އާސަންދައަށް ބޭސް ބިލް ކުރާ މައްސަލަ ބޮޑުވެ އެކަމަށް ހައްލެއް ގެނައުމުގެ ގޮތުން އެޅި ފިޔަވަޅެކެވެ.