ގައުމޫ ޔުނިވަސީޓީން ލިބެން ހުރި ތައުލީމީ ފުރުސަތުތަކާ ބެހޭ ގޮތުން މައުލޫމާތު ދޭން ބާއްވާ "ފަހި ދުވަސް" މާދަމާ ބާއްވަން ތައްޔާރުވެއްޖެ އެވެ.
މި ހަރަކާތް މާލޭގެ އިތުރުން މޯލްޑިވްސް ނެޝަނަލް ޔުނިވަސިޓީ (އެމްއެންޔޫ) ގެ ކޭމްޕަސްތައް ހުރި ހުރިހާ ހިސާބެއްގައި ކުރިއަށް ދާނެ އެވެ.
"ފަހި ދުވަސް" ހަމަޖެހިފައި ވަނީ މާދަމާ ހަވީރު އެވެ. މާލޭގައި މި އިވެންޓް ކުރިއަށް ދާނީ އާޓިފިޝަލް ބީޗްގައި ހަވީރު 4:00 އިން 6:00 އަށް ރޭގަނޑު 8:00 އިން 10:00 އަށެވެ.
ޔުނިވަސިޓީން ބުނީ އޭ ލެވެލް ނިންމާފައިވާ ދަރިވަރުންނާއި އަދި މަތީ ތަޢުލީމަށް ދާން ބޭނުންވާ މީހުންނަށް "ފަހި ދުވަސް" ގެ ކޯސްތަކަށް ކުރިމަތިލުމަށް ފޯމް ބަލައިގަތުމުގެ އިންތިޒާމު ހަމަޖައްސާފައި ހުންނާނެ ކަމަށެވެ. ކޯސްތަކަށް އެޕްލައިކުރުމުގެ އެންމެ ފަހު ސުންގަޑިއަކަށް ހަމަޖައްސާފައި ވަނީ އަންނަ މަހުގެ 25 ވަނަ ދުވަހެވެ.
"ފަހި ދުވަސް" ގައި މައުލޫމާތު ފޯރުކޮށްދޭ ދާއިރާތަކުގެ ތެރޭގައި، ބަހާއި އިންސާނީ ޢިލްމުތަކުގެ ދާއިރާ، ތަޢުލީމީ ދާއިރާ، އިންޖިނިއަރިން ދާއިރާ، ސިއްޙީ ދާއިރާ، ވިޔަފާރީގެ ދާއިރާ، ޓޫރިޒަމާއި މެހުމާންދާރީގެ ދާއިރާ، ދީނީ ޢިލްމްގެ ދާއިރާ، ސައިންސްގެ ދާއިރާ، ޝަރީއަތާއި ޤާނޫނުގެ ދާއިރާ، ނިޔެމި ކަމުގެ ދާއިރާ، އަދި ފައުންޑޭޝަން ކޯސްތަކުގެ ދާއިރާ ހިމެނެ އެވެ.