ރާއްޖޭގެ މަަޝްހޫރު ފެޝަން ޑިޒައިނަރު އަދި ފަންނާނު ޖާދުﷲ އިސްމާއީލް ސްރީ ލަންކާގައި އެކްސިޑެންޓްވެގެން ފަރުވާ ދޭން ފަށައިފި އެވެ.
މި އެކްސިޑެންޓާ ބެހާ މާ ބޮޑު ތަފުސީލެއް ލިބިފައި ނުވި ނަމަވެސް، ހާދިސާގައި ޖާދު އަށް ބޮޑެތި ގެއްލުންތަކެއް ލިބިފައިވެ އެވެ. އޭނަ ހޮސްޕިޓަލެއްގައި އެޑްމިޓްކޮށް ފަރުވާ ދެމުން އަންނަ އިރު، ރާއްޖޭގެ ފިލްމީ ދާއިރާގެ ބައެއް މީހުން ޖާދު އަށް އަވަސް ޝިފާއަކަށް އެދި އެކްސިޑެންޓްގެ ވާހަކަ ސޯޝަލް މީޑިއާގައި ހިއްސާކޮށްފައިވެ އެވެ.
ފެހުންތެރިއެއްގެ ގޮތުގައި މަޝްހޫރުކަން ހޯދުމަށް ފަހު، ޖާދު އަކީ ފިލްމީ މަސައްކަތްތަކުގައި ވެސް އުޅެމުން އަންނަ މީހެކެވެ. އެގޮތުން އޭނަ މިހާތަނަށް ވަރަށް ގިނަ ވީޑިއޯ ލަވަތަކެއް ވެސް ކުޅެފައިވާ އިރު، ފިލްމުތަކެއް ވެސް ކުޅެފައިވެ އެވެ. ޖާދު ފެނިފައިވާ ފިލްމުތަކުގެ ތެރޭގައި "ނޭދެން ވަކިވާކަށް" އަދި "ދެވަންސޫރަ" ހިމެނެ އެވެ.
ޖާދު އަކީ ވީޑިއޯ ލަވަ އަލްބަމްތަކެއް ޕްރޮޑިއުސް ވެސް ކޮށްފައިވާ މީހެކެވެ.