އަންނަ މަހު ބާއްވާ ބައި-އިލެކްޝަންގައި މާލެ ސިޓީ ކައުންސިލަށް ވާދަކުރައްވާ ޕީޕަލްސް ނެޝަނަލް ފްރޮންޓް ޕީއެންއެފް) އަށް ނިސްބަތްވާ ކެންޑިޑޭޓުންނަކީ "ޑްރީމް ޓީމެއް" ގެ ގޮތުގައި ސިފަކޮށްފި އެވެ.
ކުރީގެ ރައީސް އަބްދުﷲ ޔާމީން އިސްކޮށް ހުންނަވައިގެން އުފައްދަން މަސައްކަތްކުރާ އެ ޕާޓީ އަށް ނިސްބަތްވާ ހަތަރު ކެންޑިޑޭޓަކު އަންނަ މަހުގެ ބައި-އިލެކްޝަނަށް ވާދަކުރައްވަ އެވެ. އެއީ މޭޔަރު ކަމަށް ވާދަކުރައްވާ ކުރީގެ ޕޮލިސް ކޮމިޝަނަރު ހުސައިން ވަހީދާއި މާފަންނު ދެކުނު ދާއިރާ އަށް ވާދަަކުރައްވާ މައިޒަރު އާދަމް (ކުރޮޅި) އާއި ހެންވޭރު ދެކުނު ދާއިރާ އަށް ވާދަކުރައްވާ އައިޝަތު އަފްނާން އަލީގެ އިތުރުން ހެންވޭރު މެދު ދާއިރާ އަށް ވާދަކުރައްވާ މުހައްމަދު ޒައިން ހަސަނެވެ.
ޕީއެންއެޕް އަދި ރަޖިސްޓްރީކޮށްފައި ނުވާތީ މި ބޭފުޅުން އިންތިހާބުގައި ވާދަކުރައްވަނީ އަމިއްލަ ގޮތުންނެވެ.
ނަމަވެސް މިއީ "ޑްރީމް ޓީމެއް" ގެ ގޮތުގައި ސިފަކުރައްވައި ޕީއެންއެފް އުފެއްދުމުގައި ވަރަށް އިސްކޮށް ހަރަކާތްތެރިވެވަޑައިގަންނަވާ ކުރީގެ މިނިސްޓަރު މުހައްމަދު މަލީހު ޖަމާލު ވިދާޅުވީ "ޑްރީމް ޓީމް" އަށް އިރުޝާދު ދެއްވާނެ ތަޖުރިބާކާރު ކެޕްޓަނަކު ވެސް އެބަހުންނެވި ކަމަށާއި އެހެންވެ އެ ޓީމަށް ވޯޓް ދީ އިންތިހާބުކޮށް ދޭން އެދިވަޑައިގަންނަވާ ކަމަށެވެ.
އަންނަ މަހުގެ 13 ގައި ބާއްވާ ބައިި-އިލެކްޝަންގައި އެންމެ ވާދަވެރި މޭޔަރުގެ މަގާމަށެވެ. ހުސައިންގެ އިތުރުން އެ މަގާމަށް ވާދަކުރައްވާ ކެންޑިޑޭޓުންނަކީ ޕީއެންސީގެ ޓިކެޓްގައި ކުރީގެ އެޓާނީ ޖެނެރަލް އާޒިމާ ޝަކޫރާއި އެމްޑީޕޫގެ ޓިކެޓްގައި އާޒިމް އާދަމާއި ޑިމޮކްރެކްޓްސްގެ ޓިކެޓްގައި ސައިފް ފާތިހުގެ އިތުރުން އަމިއްލަ ގޮތުން ވާދަކުރައްވާ ޝުއައިބް އަލީ (ފުރަހަނި) އެވެ.
އިލެކްޝަން ކޮމިޝަން އީ(ސީ) އިން މިއަދު ކެންޑިޑޭޓުންގެ ނަން ތަރުތީބުކުރަން ހަމަޖެހިފައިވެ އެވެ.