ކުރިން ވެސް ރައްޔިތުންގެ މަޖިލީހުގެ މެންބަރުކަން ކުރައްވާފައިވާ ރީކޯ މޫސާ މަނިކު އަންނަ އަހަރުގެ މަޖިލިސް އިންތިހާބުގައި ވާދަކުރައްވަން ނިންމައިފި އެވެ.
އެމްޑީޕީ ޓިކެޓްގައި އޭނަ މި ފަހަރު ވާދަކުރައްވަން ނިންމަވާފައި ވަނީ މާވަށު ދާއިރާއަށެވެ. މި ވާހަކަ މޫސަ ސޯޝަލް މީޑިއާގައި ހިއްސާކުރައްވައި މިއަދު ވިދާޅުވީ 20 ވަނަ ރައްޔަތުންގެ މަޖިލީހުގައި މަސައްކަތް ކުރެއްވުމުގެ އުންމީދުގައި ހުންނެވި ކަމަށެވެ.
ހައްދުންމަތީ މާވަށު ދާއިރާގެ ރައްޔަތުންގެ މަޖްލިސް ގޮނޑިއަށް އެމް ޑީ ޕީ ޕްރައިމަރީ ގަ މިފަހަރު ވާދަކުރަންނިންމާ ، 20ވަނަ ރައްޔަތުންގެ މަޖްލީހުގާ މަސައްކަތް ކުރުމުގެ އުއްމީދުގާ ﷲގެ ވާގިފުޅާއެކު މަސައްކަތް މި ކުރަނީ pic.twitter.com/ZhuhyL4wP5
— Moosa Maniku (Reeko) (@ReekoMoosa) December 16, 2023
އޭނަ ކުރިން ހައްދުންމަތީގެ މަޖިލީހުގެ މެންބަރުކަމާއި ހުޅުހެންވޭރު ދާއިރާގެ މެންބަރުކަން ކުރެއްވި އެެވެ. އެގޮތުން މަޖިލީހުގެ ނައިބު ރައީސްކަން ވެސް ކުރެއްވި އެވެ.
މޫސަ އަކީ ފިލްމީ ތަރިއެއްގެ ގޮތުގައި އާންމުންގެ ތެރޭގައި މަޝްހޫރުވި މީހެކެވެ. ފަހުން ބޮޑު ވިޔަފާރިވެރިއަކަށް ވެސް ވި މޫސަ ކުޅުނު އެންމެ މަޝްހޫރު ފިލްމުތަކުގެ ތެރޭގައި "ފަތިސްހަނދުވަރު"، "ހައްގު" އަދި "ނާއުންމީދު" ހިމެނެ އެވެ. އަންނަ އަހަރުގެ އެޕްރީލް 12 ގައި މުހައްމަދު ނިޔާޒް (ޓެޑްރީ) ގެނެސްދޭ "ލަސްވިޔަސް…" ގެ ރޯލަކުން ވެސް މޫސަ ފެންނާނެ އެވެ