އިދިކޮޅު އެމްޑީޕީ މަޖިލިސް ޕްރައިމަރީއަށް ޝައުޤުވެރިވާ ފަރާތްތަކުން ކުރިމަތިލުމަށް އެ ޕާޓީން ހުޅުވާލައިފިއެވެ.
މިފަހަރުގެ މަޖިލީސް ޕްރައިމަރީގައި ވާދަ ކުރައްވާ ފަރާތްތަކަށް ޝައުޤުވެރިކަން ފާޅުކުރުމަށް ފުރުސަތު ހުޅޫވާލާއިރު، ކުރިމަތިލާން ބޭނުންވާ ފަރާތްތަކަށް މިމަހުގެ 25 ވަނަ ދުވަހުގެ ހަވީރު 4:00 ޖެހުމާއި ހަމައަށް ފުރުސަތު އޮންނާނެ ކަމަށް އެމްޑީޕީން ބުނެއެވެ. މިފަހަރުގެ ޕްރައިމަރީ އެމްޑީޕީން ބާއްވާނީ ދެ ދުވަހަކަށް ބަހާލައިގެން ކަމަށް އެމްޑީޕީން ބުނެއެވެ. އެއީ އަންނަ އަހަރު ޖެނުއަރީ މަހުގެ 26 އަދި 27 ގައެވެ.
އެމްޑީޕީގެ ޑެޕިއުޓީ ޗެއަރޕާސަން އިބްރާހިމް ވަހީދު ވިދާޅުވީ މިފަހަރު ޕްރައިމަރީ ދެ ދުވަހަކަށް ބަހާލައިގެން ބާއްވަން ނިންމާފައިވަނީ އިދާރީ ގޮތުން ފަސޭހަކުރުމަށް ކަަމަށެވެ. އެގޮތުން ދެ ދުވަހަށް ޕްރައިމަރީ ގެންދިއުމުގެ ބަދަލުގައި، ދެދުވަހު އެކި ދައިރާތަށް ބަހާލައިގެން ގެންދާ ގޮތަށް ހަމަޖައްސާނެ ކަަމަށާއި، މިހާރު ޕްރައިމަރީ ބާއްވާނެ ތަންތަން ހޯދުމަށް އެދިފައިވާ ކަމަށެވެ. އަދި އެތަންތަން ހަމަޖެހުމުން އޮންނާނެ ތަން އިއުލާން ކުރައްވާނެ ކަމަށް ވިދާޅުވިއެވެ.
އެމްޑީޕީން ބުނީ، އެހެން ފަހަރުތަކާއި ޚިލާފަށް މިފަހަރު އެމްޑީޕީ މަޖިލިސް ޕްރައިމަރީގައި ބާލާނެ އިތުރު ކަމަކަށް އޮތީ، ކުށުގެ ރެކޯޑު ސާފު ކުރުން ކަމަށެވެ. އެގޮތުން މިފަހަރު ޕްރައިމަރީއަށް ވާދަ ކުރެވޭނީވެސް ކުށުގެ ރެކޯޑު ސާފުކޮށްފައި އޮތް ފަރާތްތަކަށް ކަމަށް އެމްޑީޕީން ބުނެއެވެ. މިއީ ޕާޓީ ޓިކެޓުގައި ހޮވޭ ފަރާތްތައް އިލެކްޝަންސް ކޮމިޝަނަށް ހުށަހަޅާއިރު އިތުރު މައްސަލައެއް ދިމާނުވެ ކުރިއަށް ދިއުމަށް އެޅި ފިޔަވަޅެއް ކަމަށް އެމްޑީޕީން ބުނެއެވެ.
އެމްޑީޕީ މަޖިލިސް ޕްރައިމަރީގައި ވޯޓު ދެވޭނީ، އެ ޕާޓީގެ މެންބަރެއްގެ ގޮތުގައި މިއަދާއި ހަމައަށް ހުރި ނުވަތަ، މެންބަރުކަމަށް މިއަދުގެ ނިޔަލަށް ފޯމު ލާފައިވާ ފަރާތްތަކަށް ކަމަށް އެމްޑީޕީން ބުނެއެވެ. އަދި މިވަގުތު 56000 އަށް ވުރެ ގިނަ މެންބަރުން ތިބިކަން ފާހަގަކޮށް އެމްޑީޕީން ބުނީ މިހާރުވެސް އިތުރު 1000 އެއް ހައި ފޯމު އިލެކްޝަންގެ ޕްރޮސެސްއަށް ފޮނުވާފައިވާ ކަމަށެވެ.