މާލޭގައި މީހަކު ރަހީނުކޮށް މާރާމާރީ ހިންގި މައްސަލައެއްގައި ތިން މީހަކު ހައްޔަރުކޮށްފި އެވެ.
ފުލުހުން ބުނީ އެ މައްސަލައާ މި މަހުގެ 14 ވަނަ ދުވަހު ކޯޓު އަމުރެެއްގެ ދަށުން ހައްޔަރުކުރީ ތިން ފިރިހެނުން ކަމަށެވެ. އެއީ އުމުރުން 25، 26 އަދި 27 އަހަރުގެ މީހުންނެވެ. އެ ތިން މީހުންގެ ބަންދާ މެދު ގޮތެއް ނިންމުމަށް ހުކުރު ދުވަހު ކޯޓަށް ހާޒިރުކުރުމުން 25 އަހަރުގެ ފިރިހެން މީހާގެ ބަންދަށް 12 ދުވަސް އަދި އަނެއް ދެ މީހުންގެ ބަންދަށް ފަސް ދުވަހުގެ މުއްދަތެއް ޖަހާފައިވެ އެވެ.
ބައެއް މީޑިއާތަކުން ރިޕޯޓްކޮށްފައިވާ ގޮތުގައި މި ތިން މީހުންނަކީ އެއްޖިންސުން ގުޅުން ހިންގުމާއި ދީނަށް ފުރައްސާރަކުރި ކަމަށް ތުހުމަތުކުރެވޭ މައްސަލައެއްގައި ފުލުހުން މިހާރު ބަލަމުން އަންނަ ޕްރޮޖެސެކިއުޓަ ޖެނެރަލް (ޕީޖީ) އޮފީހުގެ ވަކީލު އަހުމަދު ޝަފީއު ރަހީނުކުރި ބައެކެވެ.
ނަމަވެސް މިކަން ފުލުހުން ކަށަވަރުކޮށް ދީފައެއް ނުވެ އެވެ. އެކަމަކު މައްސަލަ އަންނަނީ އިތުރަށް ތަހުގީގުކުރަމުންނެވެ.
ޝަފީއުގެ މައްޗަށް ކުރާ ތުހުމަތުތަކާއި ބަޔަކު އޭނަ ރަހީނުކުރި ކަމަށް ބުނާ ވާހަކަތައް އޭނަ ސޯޝަލް މީޑިއާ ޕޯސްޓެއްގައި ދޮގުކޮށްފައިވެ އެވެ.