މިހާރުގެ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތްތާ މިއަދަށް މަހެއްވެއްޖެ އެވެ.
އެ މަނިކުފާނު ރައީސްކަމުގެ ހުވާކުރެއްވީ މިދިިޔަ މަހުގެ 17 ގަ އެވެ. މާލޭގެ މޭޔަރުކަމުގައި ހުންނަވައި ޕީއެންސީގެ ޓިކެޓްގައި ރިޔާސީ އިންތިހާބުގައި ވާދަކުރައްވައި މުއިއްޒު އިންތިހާބު ކާމިޔާބުކުރެއްވި ސެޕްޓެމްބަރު 30 ގައި ބޭއްވި ދެވަނަ ބުރުގަ އެވެެ. ޖުމްލަ 8 ކެންޑިޑޭޓުންނާ އެކީ އިންތިހާބުގެ ފުރަތަމަ ބުރު ބޭއްވީ އެ މަހުގެ 9 ގަ އެވެ.
މުއިއްޒަކީ އިންތިހާބުގެ ދެ ބުރުގައި ވެސް ރެކޯޑް އަދަދަކަށް ވޯޓް ހޯއްދެވި ބޭފުޅެކެވެ.
ވެރިކަމާ ހަވާލުވެވަޑައިގަތުމާ އެކީ ރައީސް ވަނީ މި ސަރުކާރުގެ ފުރަތަމަ 100 ދުވަސް ނުވަތަ "ހަފުތާ 14" މަގުޗާޓެއް ވެސް އިއުލާންކުރައްވައިފަ އެވެ. އެގޮތުން މިދިޔަ ބުދަ ދުވަހު ސަރުކާރުން ބުނެފައިވާ ގޮތުގައި "ހަފުތާ 14" މަގުޗާޓްގައި ފުރަތަމަ ހަތަރު ހަފުތާގެ ތެރޭގައި ހާސިލުކުރަން އަމާޒު ހިފި ކަންކަން ވަނީ ހާސިލުކުރެވިފަ އެވެ.
ރައީސް މުއިއްޒުގެ ވެރިކަމަށް މިއަދު މަހެއްހާވީ އިރު، ސިޔާސީ މަގާމުތަކަށް މިހާތަނަށް 400 އާ ގާތްކުރާ އަދަދަކަށް ބޭފުޅުން އައްޔަންކޮށްފައިވެ އެވެ. އޭގެ ތެރޭގައި ޑެޕިއުޓީ މިނިސްޓަރުންނާއި ސްޓޭޓް މިނިސްޓަރުންނާއި ސްޓޭޓް މިނިސްޓަރުންގެ ފެންވަރުގެ މަގާމުތަކުގެ އިތުރުން ސަރުކާރު ހިއްސާވާ ކުންފުނިތަކުގެ އިސް މަގާމުތަކަށް އައްޔަންކުރެއްވި ބޭފުޅުން ހިމެނެ އެވެ.
މި ސަރުކާރުން ބުނެފައިވާ ގޮތުގައި ސިޔާސީ މަގާމުތައް 700 އަށް ވުރެ ގިނަ ނުކުރާނެ އެވެ.
އަދި މި ސަރުކާރު ވަނީ ހަރަދު ކުޑަކޮށް ހިންގާ، ރާއްޖޭގެ ރައްޔިތުން ބޭނުންވާ ތަރައްގީ އާއި ކުރިއެރުން ގެނެސްދޭން އިންތިހާ އަށް މަސައްކަތް ކުރާނެ ވަރަށް ދެފުށް ފެންނަ ސިޔާސަތެއް ގެންގުޅޭ ސަރުކާރަކަށެވެ.
ވެރިކަމާ ހަވާލުވެވަޑައިގަތް ފަހުން ރައީސް ދެ ގައުމަކަށް ރަސްމީ ދަތުރުތުތަކެއް ކުރައްވާފައިވެ އެވެ. އެއީ ތުރުކީ އާއި ޔޫއޭއީ އެެވެ. ރައީސްގެ ވެރިކަމަށް މަހެއްހާ ދުވަސްވީ އިރު، ރަސްމީ ދަތުރެއްގައި އަދި މިހާތަނަށް އަތޮޅު ތެރޭގެ އެއްވެސް ރަށަކަށް ވަޑައިގެންފައެއް ނުވެ އެވެ.