އަންނަ އަހަރު ރާއްޖެ އަށް ދެ މިލިއަން ޓޫރިސްޓުން އަންނާނެ ކަމަށް މޯލްޑިވްސް އެސޯސިއޭޝަން ފޯ ޓްރެވަލް އެޖެންޓްސް އެންޑް ޓުއަ އޮޕަރޭޓާޒް (މަޓާޓޯ) އިން ލަފާކޮށްފި އެވެ.
އެތަނުން ލަފާކޮށްފައިވާ ގޮތުގައި އަންނަ އަހަރު ނިމުމުގެ ކުރިން މަދުވެގެން 2.01 ޓޫރިސްޓުން އަންނާނެ ކަމަށް ލަފާކުރެވޭ އިރު، އެ އަދަދަކީ މި އަހަރު ރާއްޖެއަށް އަންނާނެ ކަމަށް ލަފާކޮށްފައިވާ އަދަދަށް ވުރެ 7.9 ޕަސެންޓްގެ އިތުރުވުމެކެވެ. މި އަހަރު ނިމުމުގެ ކުރިން ރާއްޖެ އަށް 1.8 މިލިއަން ޓޫރިސްޓުން ގެންނަން ސަރުކާރުން އޮތީ އަމާޒު ހިފައިފަ އެވެ. އަދި މިހާތަނަށް 1.75 މިލިއަނަށް ވުރެ ގިނަ ޓޫރިސްޓުން އައިސްފައިވެ އެވެ.
ރާއްޖެ އަށް މިހާރު އެންމެ ގިނައިން ޓޫރިސްޓުން އަންނަ ތިން ގައުމަކީ ރަޝިއާ، އިންޑިއާ އަދި ޗައިނާ އެވެ.
އަންނަ އަހަރަށް މަޓާޓޯ އިން ލަފާކުރި މުހިއްމު ނަމްބަރުތައް:
* ޔޫރަޕުން 400،000 ޓޫރިސްޓުން (20 ޕަސެންޓް)
* އޭޝިއާ އިން 1.2 މިލިއަން ޓޫރިސްޓުން (60 ޕަސެންޓް)
* އެމެރިކާ އިން 200،000 ޓޫރިސްޓުން (10 ޕަސެންޓް)
* އެހެނިހެން ހިސާބުތަކުން 210،000 އެރައިވަލް (10 ޕަސެންޓް)
މަޓޯޓާ އިން ބުނީ އަންނަ އަހަރު ޓޫރިސްޓުން އިތުރުވާ ސަބަބުތަކުގެ ތެރޭގައި ޗައިނާ އިން އަންނަ ޓޫރިސްޓުން އިތުރުވަމުން ދިއުމާއި އިތުރު އާ ޓޫރިސްޓް ފެސިލިޓީތަކެއް ހުޅުވުމާއި ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ އާ ޓާމިނަލުގެ މަސައްކަތް އަންނަ އަހަރު ނިމުމުން ރާއްޖެ އަށް ޓޫރިސްޓުން ގެންނަން ކުރެވޭ މަސައްކަތްތައް އިތުރުވުން ހިމެނެ އެވެ.
މިދިޔަ އަހަރު ރާއްޖެ އަށް އައީ 1.6 މިލިއަން ޓޫރިސްޓުންނެވެ.