ރާއްޖޭގެ އައިވީއެފް ހަދާ މިންވަރު އިތުރުވުމާއި ބަރަހަނާ މަންޒަރު ބެލުމާއި ގުޅުވައި ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރ ހަސަން ޒިހާން ދެއްކި ވާހަކައާ ގުޅިގެން ފާޓިލިޓީ ސަޕޯޓް ކޮމިއުނިޓީ ޖަމީއްޔާއިން ކަންބޮޑުވުން ފާޅުކޮށްފިއެވެ.
ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ ޒިހާން އެކްސްގައި ކުރެއްވި ޕޯސްޓެއްގައި ވަނީ އައިވީއެފް ހެދުމާއި ބަރަހަނާ މަންޒަރު ބެލުމާއި ގުޅުމެއްވާކަމަށް ދޭހަވާ ގޮތަށް ވާހަކަ ދައްކާފައެވެ. އެގޮތުން އެ ޕޯސްޓުގައި އޭނާ ވިދާޅުވީ، ބަރަހަނާ މަންޒަރު ބެލުމުގެ މައްސަލައަކީ ހަމައެކަނި ދީނީ ކަމެއް ނޫން ކަމަށެވެ. އަދި އެއީ އެއަށް ވުރެ ނުބައި ކަމެއް ކަމަށާއި އެކަން ސީދާ ދަރިމައިވުމުގެ ސިއްޙަތާއި ގުޅިފައިވާ ކަމަށެވެ. މީގެ އިތުރުން މިހާރު އެހާ ގިނަ މީހުން އައިވީއެފް ހަދަން ޖެހެނީ ކީއްވެތޯ އޭނާ ސުވާލު ކުރިއެވެ.
Tackling porn consumption isn’t just about religion. It’s the worst thing that has been contributing to deteriorating reproductive health. Why do you think so many people have to resort to IVF you dumbass! https://t.co/eDC5lW4SjZ
— Hassan Zihan (@0xZihan) December 15, 2023
އެ ޕޯސްޓާއި ގުޅިގެން ގިނަ ފާޑުކިއުންތަކެއް ސޯޝަލް މީޑިއާގައި އޭނާއަށް އަމާޒުވެފައިވާއިރު، ރާއްޖޭގެ ދަރިމައިވުމުގެ ސިއްޙަތުގެ ދައިރާގައި މަސައްކަތް ކުރާ އެންމެ ބޮޑު ޖަމީއްޔާ ކަމަށްވާ ފާޓިލިޓީ ސަޕޯޓް ކޮމިއުނިޓީން ވަނީ ކަންބޮޑުވުން ފާޅުކޮށް ބަޔާނެއް ނެރެފައެވެ.
މި ބަޔާނުގައި އެ ޖަމީއްޔާއިން ބުނީ، ސަރުކާރުގެ އޮފިޝަލަކު މިގޮތަށް ޓްވިޓު ކުރުމަކީ އެޖަމީއްޔާއި ނުހަނު ކަންބޮޑުވެ ބަލައި ނުގަންނަ ކަމެއް ކަމަށް ބުނިއެވެ. އަދި ރާއްޖޭގައި އިންފާޓިލިޓީ ނުވަތަ ދަރިމައިނުވުން އިތުރުވަމުން ދާ ކަމީ ދެބަސްވެވެން ނެތް ހަގިގތެއް ކަން ފާހަގަކޮށް އެ ޖަމީއްޔާއިން ބުނީ މިކަމާއި ބެހޭ ގޮތުން އާންމުންގެ ހޭލުންތެރިކަން ކުޑަކަމާއެކު މިފަދަ ވާހަކަތަކުގެ ސަބަބުން ދަރިމައިވުމުގެ މައްސަލަ ކުރިމަތިވެފައިވާ ފަރާތްތަކާއި މެދު ނޭދެވޭ ގޮތްތަކެއް ގެންގުޅެވި "ސްޓިގްމަޓައިޒް" ކުރެވުމަކީ އެކަށީގެންވާ ރަނގަޅު ފަރުވާއެއް ހޯދުމަށް ދިމާވާ ގޮންޖެހުމެއް ކަމަށެވެ.
އެޖަމީއްޔާއިން ބުނީ މިފަދަ ކަންކަމުގައި އެކަށޭނެ ހޭލުންތެރިކަން އިތުރު ކުރުމަށް ރާއްޖޭގެ އެކި ކަންކޮޅުތަކުގައި ސެޝަން ނަގައިދީ ބޭރުގެ މާހިރުންގެ އެހީތެރިކަން ހޯދައި އަދި ފަރުވާގެ މަގު އަންގައިދިނުމަށްވެސް ގިނަ މަސައްކަތްތަކެއް ޖަމީއްޔާއިން ކޮށްފައިވާ ކަމަށެވެ. އަދި ޖަމީއްޔާގައި 450 އަށް ވުރެ ގިނަ މެންަރުން ރެޖިސްޓަރ ވެފައިވާއިރު، މިއިން ކޮންމެ މެންބަރެއްގެ ތަފާސް ހިސާބުތައް އެއްކުރެވޭ ކަމަށް ބުނިއެވެ.
"މިއީ މިފަދަ ގޮތަކަށް ރާއްޖޭގައި އއިންފާޓިލިޓީގެ ތަފާސް ހިސާބުތައް އެއްކުރެވިފައިވާ ހަމައެކަނި ގޮތަށްވާއިރު އެކަށީގެންވާ ތަފާސް ހިސާބު ނެތި، އަދި އެއްވެސް ދިރާސާއެއް ކުރުމެއް ނެތި، ސަރުކާރުގެ އިސް މަޤާމުތަކުގައި ތިއްބަވާ ފަރާތްތަކުން އިންފާޓިލިޓީއާއި ގުޅޭގޮތުން މިގޮތަށް ވާހަކަ ދެއްކުމަކީ ކަމުގެ ސީރިއަސްކަން ގެއްލި އެފަދަ ފަރުވާއިން މަހުރޫމްވެފައިވާ ދެމަފިރިންނާއި ހާއްސަކޮށް އަންހެނުންގެ ހައްޤުތަކަށް ނިކަމެތިކަން ލިބޭ ކަމެއް ކަމުގައި މިޖަމީއްޔާއިން ދެކެވެ."
އެ ޖަމީއްޔާއިން ވަނީ މުޅި ރާއްޖޭގައި އިންފާޓިލިޓީއާއި ގުޅޭ ޕްރިވަލަންސް ސްޓަޑީއެއް ހެދުމަށް ޝައުޤުވެރިވާކަން ފާޅުކޮށްފައެވެ.
I apologize to everyone who got offended by my tweet. Infertility is a sad and unfortunate circumstance to be in. I pray that everyone who suffer from this be blessed with children.
— Hassan Zihan (@0xZihan) December 17, 2023
ޒިހާންގެ ވާހަކަތަކަށް ފާޑުކިއުން އަމާޒުވުމުން އެނާ، ކުރި އެހެން ޕޯސްޓެއްގައި އެކަމުގައި ބަޔަކު ކޮށްފައިވާ ދިރާސާއެއްގެ މައުލޫމާޓު ހިއްސާކޮށްފައެވެ. ނަމަވެސް އޭނާ ލިޔުމުގެ މަސްދަރެއް ހިއްސާއެއް ނުކުރެއެވެ. އޭގެ ފަހުން ދަރިމައިވުމާއި ގުޅޭގޮތުން އޭނާ ދެއްކި ވާހަކަތަކަށް އޭނާ ވަނީ މަޢާފަށް އެދިފައެވެ.