އިންޑިއާ ސިފައިންގެ އަދަދު ގުނަން ޖެހިއްޖެއިއްޔާ ހިލޭ ސާބަހަށް އެކަން ކޮށްދެއްވާނެ ކަމަށް ކުރީގެ މިނިސްޓަރ މުހަމްމަދު މަލީހް ޖަމާލް ވިދާޅުވެއްޖެއެވެ.
ޕީއެންއެފް އޮފީހުގައި ރޭ ބޭއްވި ޖަލްސާގައި ވާހަކަ ދައްކަވަމުން މަލީހު ވަނީ ރައީސް ޔާމީން މިނިވަން ކުރަން މި ސަރުކާރަށް މިހާރު އެއްވެސް ހުއްޖަތެއް ނެތް ކަމަށް ވިދާޅުވެ ވާހަކަ ދައްކަވާފައެވެ. އެގޮތުން މިހާރު ސަރުކާރުގެ އިސްމަޤާމުތަކުގައި ތިބީ ޕީޕީއެމްގެ މެންބަރުން ކަން ފާހަގަކޮށް ރައީސް ޔަމީން ވަގުތުން މިނިވަން ކުރަން މަލީހު ގޮވާލެއްވިއެވެ.
މަލީހު ވަނީ ރައީސް ޔާމީން ވަކާލާތު 2 ކަމަކަށްމަށް ވިދާޅުވެފައެވެ. އެގޮތުން ބޭރުގެ ސިފައިންގެ އެންމެ ބޫޓުކިބައެއްވެސް މި ޤައުމުގައި ހުރެގެން ނުވާނެ ކަމަށް ވިދާޅުވެ ސަރުކާރަށް 30 ދުވަސް ވިއިރު، އުޅެނީ ހިސާބުގެ މައްސަލައެއް ކަމަށް ވިދާޅުވެ މަލީހު ވަނީ ފާޑުވިދާޅުވެފައެވެ.
"ހިސާބުގެ މައްސަލަ އުޅޭ ކަމަށްވަންޏާ އަޅުގަނޑުމެންގެ ތެރޭގައި އެބަތިބި ހިސާބު އިލްމުވެރިން، އިންޑިއާ ސިފައިން ގުނަން ޖެހިއްޖެއިޔާ އަޅުގަނޑުމެން އެކަން ކޮށްދޭނަން ހިލޭ ސާބަހަށް. " މަލީހު ވިދާޅުވިއެވެ.
މަލީހުގެ ބަހުގެ ހަމަލާތައް ސަރުކާރަށް އަމާޒުވެފައި މިވަނީ އިންޑިއާ ސިފައިން ސާފު އަދަދެއް ސަރުކާރުން ހާމަ ނުކުރާތީއެވެ. ސަރުކާރުން ފުރަތަމަ ބުނެފައިވަނީ 77 ސިފައިން ތިބި ކަމަށެވެ. ނަމަވެސް އިތުރަށް ބަލަންޖެހޭ ކަމަށް ބުނިއެވެ. އޭގެ ފަހުން އެއަދަދު މިހާރު ސެނަހިޔާގެ ތިބި ޑޮކްޓަރުން ލައިގެން 89 އަށް ބަދަލުވެފައިވާއިރު، އަދިވެސް ކަނޑައެޅިގެން ސާފު އަދަދެއް ސަރުކާރުން ހާމައެއް ނުކުރެއެވެ.
އެކަމާއި ގުޅޭގޮތުން ސަރުކާރުގެ ޖަވާބަކީ އެކި ލިއެކިއުންތަކުގައި އެކި އަދަދުތައް ހުރުމުން އިތުރަށް ބަލަން ޖެހޭ ކަމެވެ.