އަންނަ އެޕްރީލް މަހުގެ 5 ވަނަ ދުވަހު ރިލީޒް ކުރަން ހަމަޖެހިފައިވާ ޑާކް ރެއިން އެންޓަޓައިމަންޓްގެ "އެެންމެ ފަހު ވިންދާ ޖެހެންދެން" ގެ ފުރަތަމަ ޓްރެއިލާ މިއަދު ލޯންޗްކޮށްފި އެވެ.
މި ޓްރެއިލާ އާންމުކޮށްފައި ވަނީ އެ ފިލްމުގެ ފޭސްބުކް ޕޭޖްގައި ޔޫޓިއުމް މެދުވެރިކޮށެވެ.
މުހައްމަދު އަލީ (މޮގާ) ޕްރޮޑިއުސްކޮށް، އަލީ ޝިފާއު (ޗިއްޕެ) ޑައިރެކްޓްކޮށްފައިވާ "އެންމެ ފަހު ވިންދާ ޖެހެންދެން" ގައި ލީޑް ރޯލް ކުޅެފައި ވަނީ އަލަށް އަރަމުން އަންނަ ޒުވާން ދެ ތަރިން ކަމަށްވާ ޖުމައްޔިލް ނިމާލާއި މަރިޔަމް މަޖުދާ (މަޖޫ) އެވެ.
އެ ދެ ތަރިންގެ އިތުރުން މި ފިލްމުން މުހައްމަދު މަނިކާއި އޭނާގެ އަންހެނުން ޝީލާ ނަޖީބާއީ، ހަދީޖާ އިބްރާހީމް (ކުޑަ ހައްޖަ) އާއި ކޮއްޔަ ހަސަން މަނިކާއި ރޯނު ހަސަން މަނިކު ވެސް މުހިއްމު ރޯލްތަކުން ފެނިގެން ދާނެ އެވެ.
"އެންމެ ފަހު ވިންދާ ޖެހެންދެން" އަކީ މަޝްހޫރު ވާހަކަ ލިއުންތެރިޔާ ބިންމާ އިބްރާހީމް ވަހީދުގެ ވާހަކައަކަށް މަހުދީ އަހުމަދު ސްކްރިޕްޓް ތައްޔާރުކޮށްގެން ހަދާފައިވާ އަސަރު ގަދަ ލޯބީގެ ފިލްމެކެވެ.
މި ފިލްމަކީ މި އަހަރުގެ އެންމެ އުންމީދީ އެއް ފިލްމެވެ. މި ފިލްމަށް ބެލުންތެރިން އަންނަނީ ކެތްތެރި ކަމެއް ނެތި އިންތިޒާރު ކުރަމުންނެވެ.
އެންމެ ބޮޑު ސަބަބަކީ ޒުވާން ދެ ތަރިއަކު ލީޑް ރޯލް ކުޅެފައިވާ ފިލްމެއް ފަހަކަށް އައިސް ސްކްރީނުން ފެންނާނެ ފުރަތަމަ ފަހަރަށް "އެންމެ ފަހު ވިންދާ ޖެހެންދެން" ވުމެވެ.
މި ފިލްމުގެ ޓިކެޓް މިހާރު އަންނަނީ ވިއްކަމުންނެވެ.