ބަންގްލަދޭޝްގެ މަސައްކަތްތެރިންގެ އަދަދުތަކާ ގުޅޭ ރިޕޯޓުތަކާއި ޕޯސްޓުތައް ޑިލީޓުކުރި މައްސަލަ ބަލަން އިކޮނޮމިކް މިނިސްޓަރު މުހައްމަދު ސައީދު އަންގަވައިފި އެވެ.
ސޯޝަލް މީޑިއާ ޕޯސްޓެއްގައި މިނިސްޓަރު ވިދާޅުވީ، އެއްވެސް ޕޯސްޓެއް ޑިލީޓުކުރުމަށް އަންގަވާފައި ނުވާނެ ކަމަށެވެ.
"އެހެންވެ] އެކަން ކުރި ސަބަބު ތަހުގީގުކުރަން މިހާރު ވާނީ އަންގާފައި." ކުރިން ވެސް އިކޮނިމިކް މިނިސްޓަރުކަން ކުރެއްވި ސައީދު ވިދާޅުވި އެވެ.
މިދިޔަ ސަރުކާރުން ފާއިތުވި މިދިޔަ ނޮވެމްބަރު މަހުގެ ތެރޭގައި އާންމުކުރި ބިދޭސީ މަސައްކަތްތެރިންގެ އަދަދުތަކާ ބެހޭ ތަފާސްހިސާބުތައް "ނައްތައިލި" ވާހަކަ ދެކެވެން ފެށީ ބަންގްލަދޭޝްގެ މަސައްކަތްތެރިން އަލުން އެތެރެވާން ރައީސް ޑރ. މުހައްމަދު މުއިއްޒުގެ ސަރުކާރުން ހުއްދަ ދިނުމާ ގުޅިގެންނެވެ.
އެގޮތުން ކުރިން ތަފާސްހިސާބުތައް ސޯޝަލް މީޑިއާގައި ހިއްސާ ކުރައްވައި ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް ވަނީ ބަންގްލަދޭޝް މަސައްކަތްތެރިން އަލުން އެތެރެވާން ހުއްދަ ދިނުމާ ގުޅިގެން ކަންބޮޑުވުން ފާޅުކުރައްވައިފަ އެވެ.
މިނިސްޓްރީން އެ ރިޕޯޓުތައް ޑިލީޓުކޮށްލާފައިވަނީ އެ މައްސަލައިގައި ސަރުކާރަށް ފާޑުކިޔުންތައް އަމާޒުވެފައިވަނިކޮށެވެ.