ބޯހިޔާވަހި ކަމަށް މަގުފަހިކޮށް ދިނުމުގެ ގޮތުން ވަރަށް އަވަހަޑް ހައުސިން ލޯން ސްކީމެއް ތައާރަފުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ކުރިން ފުށިދިއްގަރުގެ ނަމުގައި ހިންގަން ނިންމި މަޝްރޫއު "ރަސްމާލެ" އަށް ބަދަލުކޮށް ހިއްކަން ފެށުމުގެ ގޮތުން އިއްޔެ ބޭއްވި ރަސްމިއްޔާތުގައި ރައީސް ވިދާޅުވީ ހައުސިން ލޯން ސްކީމަކީ އިންތިހާބީ ވައުދެއް ވެސް ކަމަށާއި އެ ވައުދާ އެއްގޮތަށް މަސައްކަތް ކުރައްވާނެ ކަމަށެވެ.
ރައީސް ވިދާޅުވީ ބޯހިޔާވަހިކަމަށް ދޫކުރާ އެކި ބާވަތުގެ ލޯނު ސްކީމްތައް ތައާރަފުކުރުމަށްޓަކައި ބޭންކިން ނިޒާމުގެ ތެރެއިން ފަހިކުރަން ޖެހޭ ކަންތައްތައް ހަމަޖައްސައި އެކަންތައް އިއުލާން ކުރައްވާނެ ކަމަށެވެ. ރައީސް ވިދާޅުވި ގޮތުގައި 5 ޕަސެންޓަށް ވުރެ ކުޑަ އިންޓަރެސްޓެއްގައި ދޫކުރާ އެ ލޯނުތައް ތައާރަފޔުކުރުމަށްޓަކައި ކުރަން ޖެހޭ އިދާރީ މަސައްކަތްތައް ސަރުކާރުން މިހާރު އަންނަނީ ކުރަމުންނެވެ.
"އިރާދަކުރެއްވިއްޔާ ރައްޔިތުންނަށް، އެ ރައްޔިތުންނަށް ބޭނުންވާ އެކި ކަހަލަ ލޯނުތައް ދޫކުރުމުގެ މަސައްކަތް ފެށިގެން ދާނެ." ރައީސް ވިދާޅުވި އެވެ.
ރައީސް މުއިއްޒު ވިދާޅުވީ މާލެ ސަރަހައްދުން ދޫކުރި ގޯތިތަކުގައި ގެދޮރު ބިނާކުރަން ދޫކުރާނެ ކަމަށް ވައުދުވެފައިވާ ލޯނުތައް ވެސް ހިމެނޭނީ އަލަށް ތައާރަފުކުރާ ސްކީމްގަ އެވެ.